धादिङको बेल्खुमा ट्रक र हायस ठोक्किँदा १६ जना घाइते
धादिङको बेल्खुमा ट्रक र हायस गाडी ठोक्किँदा १६ जना घाइते भएका छन्।
काठमाडौं, पुस २५ : धादिङको बेल्खुमा ट्रक र हायस गाडी ठोक्किँदा १६ जना घाइते भएका छन्।
पृथ्वी राजमार्गअन्तर्गत धादिङको गल्छी गाउँपालिका-४ बेल्खुमा पोखराबाट आउँदै गरेको ग २ ख ६६६ नम्बरको हायस र काठमाडौंबाट जाँदै गरेको ना ६ ख ७१८ नम्बरको ट्रक आपसमा ठोक्किएका थिए।
दुर्घटना हुँदा हायसका चालकसहित त्यसमा सवार १६ जना घाइते भएको जिल्ला प्रहरी कार्यालय धादिङले जनाएको छ।
घाइतेहरूमा एक विदेशी नागरिक, धादिङको सिद्धलेक गाउँपालिका-६ का २४ वर्षीय यमबहादुर घले, तनहुङ्को शुक्ला गण्डकी गाउँपालिका- ७ का ३८ वर्षीय सुनिता आले, गोरखाको लखन गाउँपालिका-१ बस्ने २१ वर्षीय समय अर्याल, ६१ वर्षीय मधुमाया अर्याल, धादिङको बेनीघाट रोराङ गाउँपालिका-६ का ३९ वर्षीय रमेश थापा, नाम नखुलेकी २२ र १८ वर्षीया युवती, म्याग्दीको बेनी नगरपालिका-४ का ३४ वर्षीय पुरन पुन र कास्कीको पोखरा महानगरपालिका-१४ का ३४ वर्षीय पुष्प पुन रहेका छन्।
त्यस्तै स्याङ्जाका २५ वर्षीय रविना शाह, नुवाकोट बिदुरका २१ वर्षीय विवेक मिजार, धादिङको नीलकण्ठ नगरपालिका-२ बस्ने २६ वर्षीय राज गुरूङ, कास्कीको पवखरा महानगरपालिका-१४ की सुस्मिता आले, २२ महिनाकी रिहान पुन, ३३ वर्षीय खिमराज पुन छन्।
घाइते सबैलाई उपचारका लागि काठमाडौंको ट्रमा सेन्टर लगिएको धादिङ प्रहरीले जनाएको छ।
