गुल्सन चम्किँदा मधेश १२९ रनमै अलआउट
वीरगञ्जस्थित नारायणी रंगशालामा खेलमा टस हारेर पहिला ब्याटिङ गरेको मधेश ४२.४ ओभरमा १२९ रनमा समेटिएको हो।
काठमाडाैं, पुस २४ : जय ट्रफी एलिट कपको आफ्नो दोस्रो खेलको पहिलो इनिङमा मधेश प्रदेश १२९ रनमै अलआउट भएको छ। वीरगञ्जस्थित नारायणी रंगशालामा खेलमा टस हारेर पहिला ब्याटिङ गरेको मधेश ४२.४ ओभरमा १२९ रनमा समेटिएको हो।
‘इनफम’ ब्याट्सम्यान मयन यादवले अर्धशतक प्रहार गरेपनि अन्यले गतिलो साथ नदिँदा मधेश सस्तैमा समेटियो। अघिल्लो खेलमा शतक बनाएका मयनले पुलिसविरुद्ध १०२ बलमा ५ चौका र २ छक्का मद्दतमा ५९ रन बनाए।
यस्तै, निरज यादवले ३४ बलमा ६ चौका मद्दतमा २९ रन बनाउँदा अविशेक तिवारीले १७ रन बनाए। अन्यले भने दोहोरो अंकमा स्कोर बनाउन सकेनन्।
मधेशलाई सस्तैमा समेट्ने क्रममा पुलिसका गुल्सन झाले ५ विकेट लिए। उनले १३ ओभरमा ४ मेडनसहितद्ध ४९ रन खर्चिए। उनी जारी प्रतियोगितामा एक इनिङमा ५ विकेट लिने पहिलो फास्ट बलर हुन्। यस्तै, कुशल भुर्तेलले २ विकेट लिए।
आजै दोसो इनिङ सुरु गरेको पुलिसले ताजा अवस्थामा ८ ओभरमा विनाक्षति ३३ रन बनाएको छ।
