बालबालिका र किशोर किशोरीका समस्या समाधान गर्न कानुन आवश्यक : सभामुख घिमिरे

काठमाडौं, कात्तिक ३० : सभामुख देवराज घिमिरेले बालबालिका, किशोर किशोरी सम्बन्धी समस्या समाधान गर्न उपयुक्त प्रबन्ध मिलाउने बताएका छन्। 

राष्ट्रिय किशोरी तथा किशोर सञ्जालको भक्तपुरमा भएको राष्ट्रिय भेलाको निष्कर्ष सभामुख समक्ष हस्तान्तरण कार्यक्रममा उनले किशोर किशोरीहरुका समस्या सम्बन्धी विभिन्न संघसंस्थाहरुले दिएको सुझावको पूर्ण कार्यान्वयन गर्न आवश्यक छलफल बहसहरु गर्ने बताए। 

‘प्रजातान्त्रिक वातावरणमा जनताका विचारहरु, जनताका समस्याहरु, जनताका चाहनाहरुभित्र बालबालिका, किशोर किशोरीहरुका समस्याहरुलाई विभिन्न क्लबहरु वा संघसंस्थाहरुकोमार्फत आएको सुझावको पूर्ण कार्यान्वयन गर्न आवश्यक छलफल वा बहसहरु गर्नेछौं,’ उनले भने, ‘राज्यले यसलाई आवश्यक ध्यान दिनको लागि उपयुक्त ढंगबाट प्रबन्ध मिलाउनको लागि संसदको तर्फबाट निर्देशनका लागि अझ प्रभावकारी बनाउने विषयमा छलफल गर्नेछौं।’

उनले सातवटै प्रदेशमा काम गरिरहेका क्लब वा संघसंस्थाहरु, किशोर किशोरीहरु, अल्पसंख्यकहरुले व्यहोरिरहेका समस्याहरुको विश्लेषण र सम्भावनामाथिको बहस हुनु जरुरी रहेको बताए। 

सामाजिक रुपबाट तिरस्कृत भएका बालबालिकाहरु र अभिभावकले निर्वाह गर्नुपर्ने दायित्व र व्यवहारको अभावको बेलामा कानुनी व्यवस्था आवश्यक रहेको उनले औंल्याए।