नेपालका ३७ हिमाल आरोहण गर्न ७० देशबाट आए ८७० आरोही
पर्यटन विभागका अनुसार यो सिजनमा विभिन्न ३७ हिमाल आरोहणका लागि १११ आरोही समूहका २०२ महिला र ६६८ पुरुष गरी कूल ८७० जनाले अनुमति लिएका हुन्।
काठमाडौं, कात्तिक २९ । शरद् ऋतु (अटम सिजन) मा हिमाल आरोहण गर्न नेपालसहित ७० देशका ८७० आरोहीले अनुमति लिएका छन्।
पर्यटन विभागका अनुसार यो सिजनमा विभिन्न ३७ हिमाल आरोहणका लागि १११ आरोही समूहका २०२ महिला र ६६८ पुरुष गरी कूल ८७० जनाले अनुमति लिएका हुन्।
हिमाल आरोहणबापत ६ करोड ३५ लाख ७९ हजार ५३ रोयल्टी रकम सरकारी खातामा जम्मा भएको पर्यटन विभागका निर्देशक राकेश गुरुङले जानकारी दिए। शरद् ऋतुको आरोहण करिब अन्तिम चरणमा पुगेको उनले बताए।
निर्देशक गुरुङका अनुसार मनास्लु र हिम्लुङको आरोहण सकिएको छ भने अमादब्लमलगायत हिमालको आरोहण धमाधम भइरहेको छ।
अहिले ससाना समूहमा आरोही आइरहेका भन्दै उनले अब दुई/चार जनाले मात्रै आरोहण अनुमति लिने अनुमान गरिएको बताए।
विगतमा जस्तै यो सिजनमा पनि मनास्लु (८,१६३ मिटर) हिमाल आरोहणमा सर्वाधिक २८ आरोही समूहका ३०८ जनाले अनुमति लिएका विभागको पर्वतारोहण शाखाले जनाएको छ।
अमादब्लम १४ आरोही समूहका १५८, हिम्लुल आरोहणका लागि १० आरोही समूहका १२४ तथा धौलागिरिमा एक आरोही समूहका १४, मकालुमा एक आरोही समूहका दुई आरोहीले अनुमति लिएका छन्।
