धर्मका नाममा राजनीति हुनु हुँदैनः प्रधानमन्त्री

काठमाडौं, कात्तिक २७ : प्रधानमन्त्री केपी ओलीले कुनै पनि धर्मका नाममा राजनीति हुन नहुने बताएका छन्।

प्रधानमन्त्री निवासमा आज जैनश्वेताम्बर तेरापन्थ सभाका पदाधिकारीसँगको भेटमा प्रधानमन्त्रीले धर्म निरपेक्ष हाम्रो मुलुकमा राज्यले सबै धर्मलाई सम्मान गर्ने भएकाले यसका नाममा राजनीति हुन नहुने बताएका हुन्।

‘नेपालमा एकातिर हिन्दूू राज्य हुनुपर्छ भनेर अभियान चलाइएको छ। अर्कातिर इसाई धर्म विस्तारका नाममा गरिबीको दुरुपयोग गरिएको छ,’ प्रधानमन्त्री ओलीले भने, ‘यस्ता कुरालाई हामी क्रमशः नियन्त्रण गर्छौं। हामीले कुनै पनि धर्मका नाममा असहिष्णुता र संकीर्णता राख्नु हुँदैन। कुन धर्म मान्ने भन्ने मान्छेको व्यक्तिगत आस्थाको कुरा हो। त्यसको हामी सम्मान गर्छौं।’

त्यस अवसरमा आचार्य महाश्रमणका शिष्यहरु रमेशकुमार र रत्नकुमारले समाजमा नैतिकता, सद्भावना, मानवता, नशामुक्त समाज निर्माणका साथै शान्तिका लागि आफूूहरुले गरेका कामबारे प्रधानमन्त्रीलाई जानकारी गराए।