स्पष्टीकरणको प्रतिबाद गर्न एमाले नेता रावलको आव्हान 

काठमाडौं, कात्तिक १२ : नेकपा एमालेका नेता भीम रावलले तानाशाही शैलीमा स्पष्टीकरण मागिएको र धम्क्याइएको आरोप लगाएका छन् । उनले उक्त स्पष्टीकरणको विरोध र प्रतिबाद गर्न कार्यकर्तालाई आव्हान समेत गरेका छन् । 

भाटभटेनी सुपर स्टोरका व्यवसायी मीनबहादुर गुरुङले केन्द्रीय कार्यालय बनाउन जग्गा दान गरेको विषयमा विरोध गरेको भन्दै एमालेले रावलसहित तीनजना नेतासँग स्पष्टीकरण मागेको बिषयमा उक्त भनाई आएको हो । एमाले नेता रावलले सोमबार सामाजिक सञ्जालमार्फत तानाशाही शैलीमा स्पष्टीकरण मागेको भन्दै प्रतिबाद गरेका हुन् । 

रावलले सामाजिक सञ्जालमा लेखेका छन्, ‘एमालेको जबज, परम्परा र संवैधानिक हकविपरीत कुनै बैठक र छलफल नगरी पदको दुरुपयोग गर्दै सु.प. प्रदेश कमिटी, अछाम र कैलाली जिल्ला कमिटीका सदस्यहरूलाई तानाशाही शैलीमा स्पष्टीकरण सोध्ने र धम्क्याउने गलत कार्यको सबै न्याय प्रेमी, इमानदार र सिद्धान्तनिष्ठ व्यक्तिहरूले विरोध र प्रतिवाद गरौँ ।’