‘एकजुट भएर काम गरेमा नेपालको विकास सम्भव छ’
‘नेपालमा विकासका लागि बाटाघाटा र आवश्यक पूर्वाधार बनिसकेका छन्। अहिले दुर्गम भन्ने कुनै जिल्ला र भूभाग छैन। सबै मिलेर काम गरेमा मुलुकलाई समृद्ध बनाउन सकिन्छ,’ उनले भने।
काठमाडौं, कात्तिक ११ : प्रधानमन्त्री केपी ओलीले विकासका लागि पूर्वाधार तयार भइसकेकाले सबै एकजुट भएर काम गरेमा नेपालको विकास सम्भव हुने बताएका छन्।
गैरआवासीय नेपाल संघ (एआरएन) दिवस तथा ग्लोबल कन्क्लेभ २०२४लाई सम्बोधन गर्दै प्रधानमन्त्री ओलीले प्रविधि र उपकरण बढ्दो भएकाले विकास गर्न नसकिने भन्ने नहुने बताए।
‘नेपालमा विकासका लागि बाटाघाटा र आवश्यक पूर्वाधार बनिसकेका छन्। अहिले दुर्गम भन्ने कुनै जिल्ला र भूभाग छैन। सबै मिलेर काम गरेमा मुलुकलाई समृद्ध बनाउन सकिन्छ,’ उनले भने।
गैरआवासीय नेपाली संघको छविलाई कायम राखी संगठनलाई एकताबद्ध राख्दै साझा हितका लागि काम अनुरोध उनले गरे। ओलीले भने, ‘सरकारका तर्फबाट सङ्घलाई कुनै हस्तक्षेप हुँदैन, निष्पक्ष भई स्वतन्त्र रुपमा काम गर्नुहोस, सहयोग गर्न सरकार तयार छ।’
‘म अहिले प्रधानमन्त्री छु, म देशको प्रधानमन्त्री हो। एमालेको मात्रै प्रधानमन्त्री होइन। राष्ट्रपति पनि त्यही हो, राष्ट्रपति दल विशेषको हुँदैन, राष्ट्रको प्रमुख हुन्छ,’ उनले भने, ‘त्यसैगरी सभामुख, प्रधानन्यायाधीशजस्ता पद साझा हुन्। हामीले त्यस हैसियतले काम गर्ने हो।’
आफू सन् १९९९ मा मस्को जाँदा डा उपेन्द्र महतोसँग गैरआवासीय नेपाली अभियानबारे कुरा भएको स्मरण गर्दै प्रधानमन्त्री ओलीले एनआरएनलाई पहिचान र आवश्यक सुविधा दिन कुनै कञ्जुस्याइँ नगर्ने स्पष्ट गरे।
प्रधानमन्त्री ओलीले जिम्मेवार नेताबाट हतियार नचलाए पनि कसरी बिसाउनुपर्छ भन्ने जानेकाले ‘हतियार बिसाएका मात्रै हौँ’ भनी धम्कीपूर्ण भाषा प्रयोग हुनथाल्नु देश र जनताका लागि दुःखद् भएको प्रसंग उल्लेख।
