आफैले जन्माएको अधिकारहरूको कटौती सरकारले कदापी गर्दैन : कार्यवाहक प्रधानमन्त्री

काठमाडौं, असोज ९ । कार्यवाहक प्रधानमन्त्री एंव सहरी विकासमन्त्री प्रकाशमान सिंहले राजनीतिक अस्थिरता दिनको लागि नेपाली कांग्रेस, नेकपा एमाले लगायतका दलहरु मिलेर सरकार बनाएको बताएका छन् । 

बुधबार ‘भक्तपुर साँस्कृतिक, पर्यटन तथा व्यापार महोत्सव २०८१’ को समुद्घाटन समारोहमा उनले राजनीतिक अस्थिरताले गर्दा गर्नुपर्ने काम र संसदबाट पास हुनुपर्ने विधेयकहरु पनि पास हुन नसकेकाले ती सबै काम पूरा गर्न वर्तमान सरकार बनेको बताएका हुन्। 

‘अहिलेको राजनीतिक अस्थिरताले गर्दा गर्नुपर्ने कामहरु भएको छैन्, संसदबाट पास हुनुपर्ने विधेयकहरु पनि पास भएको छैन् । यो सबै कार्य सम्पन्न गर्नको लागि नेपाली कांग्रेस र नेकपा एमाले लगायतका दलहरु मिलेर अहिलेको सरकार बनेको हो । वर्तमान सरकारमा संलग्न दलहरुले आफै जन्माएको अधिकारहरुको कटौती आफैले गर्ला भनेर सोच्नु, जन्म दिने आमाले आफ्नो बच्चाको अहित गर्नु जस्तो हो ।’ 

यसको साथै, उनले राजनीतिक स्थिरताबिना कुनै क्षेत्र स्थिर हुन नसक्ने भएकाले सबैभन्दा पहिला राजनीतिलाई स्थिर गर्नुपर्ने बताए।

‘अहिले अर्थतन्त्रलाई एउटा गति दिनको लागि राजनीतिक स्थिरता आवश्यक हुन्छ । यो बिना अरु कुनै क्षेत्र स्थिर हुन नसक्ने भएको हुनाले सबैभन्दा पहिला राजनीतिक स्थिरता दिनुपर्छ । अहिले सरकार परिवर्तन भइराख्दा जनतामा निराशा छाएको छ,’ उनले भने।