पहिरोले डुम्रे–बेंसीसहर सडक अवरुद्ध
सडकमा माटोसहितको ठूलो पहिरो खसेर सडक अवरुद्ध भएको छ। पानी निरन्तर रूपमा परिरहेकाले पहिरो पन्छाउन समस्या भएको जनाइएको छ।
लमजुङ, भदौ १६ : पहिरोले डुम्रे–बेंसीसहर सडक अवरुद्ध भएको छ।
अविरल वर्षाले यस सडकअन्तर्गत लमजुङ बेंसीसहर नगरपालिका–१ उदिपुरमा आज बिहान पहिरो खस्दा सडक अवरुद्ध भएको जिल्ला प्रहरी कार्यालयका सूचना अधिकारी थानेश्वर चपाईँले बताए।
उनका अनुसार सडकमा माटोसहितको ठूलो पहिरो खसेर सडक अवरुद्ध भएको छ। पानी निरन्तर रूपमा परिरहेकाले पहिरो पन्छाउन समस्या भएको जनाइएको छ। सडक अवरुद्ध भएपछि सवारीसाधन अलपत्र परेका छन्।
यो स्थानमा विगत तीन वर्षअघिदेखि बर्सेनि पहिरो खस्न थालेको हो बेंसीसहरबाट तनहुँ–काठमाडौँ–पोखरा–चितवनलगायत स्थानमा जाने र सो स्थानबाट बेँसीसहर आउने यात्रीलाई समस्या भएको छ।
यस सडक हुँदै मनाङवासीसमेत आवतजावत गर्ने गर्दछन्। बर्खा लागेयता दर्जनौं पटक यो सडकका विभिन्न स्थानमा पहिरो पटकपटक सडक अवरुद्ध बनाउँदा यात्रीलाई सास्ती भएको छ।
प्रकाशित मिति: १२:४९ बजे, आइतबार, भदौ १६, २०८१
प्रतिक्रिया दिनुहोस्
थप समाचार
