‘मुलुकको सबैभन्दा ठूलो आय स्रोतका रुपमा उर्जालाई लिन सकिन्छ’

काठमाडौं, भदौ ११ : उर्जा, जलस्रोत तथा सिंचाईमन्त्री दीपक खड्काले मुलुकको उर्जा क्षेत्रको विकासका लागि पूर्वमन्त्रीहरुसँग छलफल कार्यक्रम गरेका छन्। 

मंगलबार सिंहदरबारस्थित मन्त्रालयमा पूर्वमन्त्रीहरुसँग छलफल गरेका हुन्। 

छलफलमा मन्त्री खड्काले मुलुकको सबैभन्दा ठूलो आय स्रोतका रुपमा लिन सकिने उर्जा क्षेत्रको विकासको तिव्रताको गतिलाई पूर्णता दिनुपर्ने बताए। थन्केर बसेको ठूला आयोजनाहरुलाई अगाडि बढाउनुपर्ने आवश्यक रहेको भन्दै पूर्वमन्त्रीहरुसँग छलफल मन्त्रालयलाई मार्गदर्शन प्रदान गर्ने विश्वास व्यक्त गरे। 

‘लक्ष्यहरु परिपूर्ती गर्न र बिक्री गर्न आयस्रोतका हिसाबले पनि मुलुकको ठूलो आय स्रोतका रुपमा लैजान प्रशस्त कामहरु गर्नुपर्नेछ।  चुनौति र अनुभव अब राज्यले लिनुपर्ने नीतिका लागि आवश्यक छ,’ उलने भने, ‘ठूला आयोजनाहरु थन्केर बसेको अवस्था छ । यिनलाई अब अगाडि बढाउनुपर्ने आवश्यक छ। यहाँहरुको अनुभव पनि यो मन्त्रालयलाई मार्गदर्शन हुनेछ।’

पूर्वउर्जामन्त्री शक्ति बहादुर बस्नेतले जलासययुक्त आयोजनामा नगइ नहुने अवस्था रहेकाले यसका निजी क्षेत्रलाई ल्याउन आवश्यक रहेको बताए। 

‘आगामी १० वर्षसम्म १३ देखि १४ हजार आफैले उत्पादन गर्ने योजनाका लागि एउटा जलासययुक्त आयोजनामा जानुको विकल्प नरहेको र जलासययुक्त आयोजनामा लागतको हिसाबले आकर्षक नरहेको कारण यसमा राज्यले केही व्यवस्थापन गर्नुपर्छ,’ उनले भने।

उनले जलासययुक्त आयोजनामा नगइ नहुने बताउँदै यसमा निजी क्षेत्रलाई ल्याउनु पर्ने बताए।

‘सुख्खा मौसममा आत्मनिर्भर हुने र आगामी १० वर्षसम्म १३ देखि १४ हजार आफैले उत्पादन गर्ने योजना हुनैपर्छ। त्यसको लागि एउटा जलासययुक्त आयोजनामा जानुको विकल्प छैन,’ उनले भने।

पूर्वमन्त्री ज्ञानेन्द्र बहादुर कार्कीले योजनाहरू बनाउने तर निर्धारित समयमा सम्पन्न नहुँदा त्यसको लागत बढेर गएको भन्दै कसरी सम्पन्न गर्ने त्यसको बारेमा गम्भीरताकासाथ सोच्न आवश्यक रहेको बताए।

जलस्रोतको विकासबाट नै देशको समृद्धि हुने भएकाले विद्युतको विकासमा ध्यान पूर्ण रुपले केन्द«ीत हुन जरुरी रहेको उनको भनाई छ।