निलकण्ठ युवा समितिको आयोजनामा बुढानीलकण्ठ नगरस्तरीय फुटसल आयोजना

काठमाडौं, भदौ ४ : निलकण्ठ युवा समितिले आज बुढानिलकण्ठ नगरपालिका–४ पासिकोटमा बुढानिलकण्ठमा नगर स्तरीय फुटसलको आयोजना गरेको छ । २१ वटा टिम रहेको खेलमा बुढानीलकण्ठ नगरपालिकाका सबै १३ वटा वडाका युवाहरूको सहभागिता रहेको छ ।

खेल उद्‌घाटन समारोहमा खेलाडीको मनोबल बढाउन स्वास्थ्य मन्त्री प्रदीप पौडेल, बुढानीलकण्ठका नगरप्रमुख मिठाराम अधिकारी, उपप्रमुख अनिता लामा लगायत १३ वटै वडाका जनप्रतिनिधिहरूको सहभागिता रहेको थियो ।

मन्त्री पौडेलले खेलकुद र कसरतको सहायताले नै मानिस स्वस्थ रहने भन्दै मानव जीवनमा खेलको महत्वपूर्ण स्थान रहेको बताए  उनले खेलको आयोजना गरेर युवामा जोश र जाँगर थपेको भन्दै नीलकण्ठ युवा समितिलाई धन्यवाद दिए । रोग लागेर उपचार गर्नुभन्दा खेलमार्फत स्वस्थ रहनेतर्फ ध्यानदिनु पर्ने मन्त्री पौडेलले औंल्याए। 

आज बिहान ८ बजे सुरु भएको एक दिवसीय खेल बेलुकासम्म जारी रहन्छ। खेल सकिएपछि कार्यक्रम सफल बनाउन सहयोग गर्ने समाजसेवाहरू लगायतलाई सम्मान गरिने कार्यक्रम पनि रहेको आयोजक समितिका अध्यक्ष सुशान्त भण्डारीले जानकारी दिए।