स्याङ्जामा पहिलोपटक कविता महोत्सव, 'देश फर्किरहेको देश' सर्वोकृष्ट

काठमाडौं, साउन ३२ : स्याङ्जामा नै पहिलोपटक कविता महोत्सव एवं राष्ट्रिय खुल्ला कविता प्रतियोगिता २०८१ भव्यताका साथ सम्पन्न भएको छ । बिहिबार सम्पन्न कविता प्रतियोगितामा सिन्धुपाल्चोकका सुन्दर शिरीषको “देश फर्किरहेको देश” सर्वोउत्कृष्ट घोषित भयो । 

प्रतियोगितामा राजन सुबेदी दीपक (झापा) को “हराएको देश” द्वितीय, चन्द्रवती अधिकारी (बाँके) को “अ आए” तृतीय र विनायक पन्त (तनहुँ) को ब्रह्माण्ड मस्तिष्क र सम्झना थापा मगर (स्याङ्जा) को सम्झनु त्यही मेरो देश हो सान्त्वना भए । प्रतियोगितामा प्रथमले १५ हजार ५५५, द्वितीयले ११ हजार १११, तृतीयले सात हजार ७७७ र सान्त्वनाले तीन हजार ३३३ रुपियाँ पुरस्कार सहित प्रमाणपत्र प्राप्त गरे । 

पुष्प–चन्द्र ट्रष्ट स्याङ्जाले आयोजना गरेको प्रतियोगितामा देशभरबाट आएका १९९ कवितामध्ये निणार्यक मण्डलले २० कवितालाई उत्कृष्ट कविता बाचन गरिएको थियो र २० मध्येबाट उत्कृष्ट ५ कवितालाई पुरस्कृत गरिएको खुल्ला कविता प्रतियोगिताका संयोजक अनन्त कुमार श्रेष्ठले जानकारी दिए । 

पुष्प चन्द्र ट्रस्ट स्याङ्जाको आयोजना तथा पुतलीबजार प्रज्ञा प्रतिष्ठान र स्याङ्जा साहित्य प्रतिष्ठानको सह आयोजनामा नेपाली भाषा, कला, संस्कृती, साहित्य र शैक्षिक उन्नयनमा हाम्रो अनुष्ठान भन्ने मूल नाराका साथ महोत्सव एवं प्रतियोगिता गरिएको हो । महोत्सवमा नेवा परम्पराको लाखे लगायत सांस्कृतिक, विभिन्न जातजातिका भेषभूषा, झाँकी प्रदर्शन सहित साहित्यिक यात्रा समेत गरिएको थियो ।

कार्यक्रममा पुष्प–चन्द्र स्मृति सेवा पुरस्कार २०८१ बाट अमोर सेवा नेपाल (वाल गृह) फेदीखोला गाउँपालिका १ र एसइई २०८१ मा जिल्ला टपर सुशान मरासिनीलाई सम्मान समेत गरिएको थियो ।