माओवादीको स्थायी कमिटी बैठकमा पार्टी कमिटीको आकार घटाउने प्रस्ताव
उनले पार्टी नेतृत्वको विषयमा विधिगत छलफलतिर जानुपर्ने सुझाव आएको भन्दै सबैको सामूहिक नेतृत्वको केन्द्रीकृत अभिव्यक्ति अहिले प्रचण्डबाट मात्रै हुन्छ भन्ने सबैले राखेको पनि बताए।
काठमाडौं, साउन २८ : नेकपा माओवादी केन्द्रका प्रवक्ता अग्नि प्रसाद सापकोटाले बैठकमा पार्टी कमिटीको आकार सानो बनाउनुपर्ने प्रस्ताव आएको बताएका छन्।
सोमबार पार्टी कार्यालयमा बसेको स्थायी कमिटी बैठकपश्चात उनले बैठकमा नेताहरूले कमिटीको आकार घटाउनुपर्ने सुझाव राखेको बताए।
‘आज सबैले जोड दिएर भनेको कुरा के हो भने हाम्रो चिन्तनको धरातल माथि उठ्नु पर्यो हाम्रा छलफल बहस दर्शन, विचार, राजनैतिक सिद्धान्तमा बढि केन्द्रीत हुनुपर्यो र यसको साथै पार्टी कमिटी आलोचना, आत्मालोचना गर्न पनि धौधौ हुने खालका ठूला भए त्यो पार्टी कमिटी सानो बनाउनुपर्छ भन्ने छ,’ उनले भने।
उनले पार्टी नेतृत्वको विषयमा विधिगत छलफलतिर जानुपर्ने सुझाव आएको भन्दै सबैको सामूहिक नेतृत्वको केन्द्रीकृत अभिव्यक्ति अहिले प्रचण्डबाट मात्रै हुन्छ भन्ने सबैले राखेको पनि बताए।
‘नेतृत्वको सवालमा त्यसको वैचारिक, राजनीतिक, सांगठनिक, विधिगत छलफलतिर जानुपर्छ भन्ने छ,’ उनल ेभने, ‘सबैको सामूहिक नेतृत्वको केन्द्रीकृत अभिव्यक्ति, त्यसको केन्द्रीकृत अभिव्यक्ति भनेको अहिले प्रचण्डबाट मात्रै हुन्छ भन्ने कुरा पनि सबैले राख्नुभएको छ।’
माओवादीको स्थायी कमिटी बैठक शुक्रबारदेखि जारी छ।
