भारतसँगको विद्युत व्यापार सम्झौता विवादमा सर्वोच्चमा सुनुवाइ

काठमाडौं, साउन २४ : भारतसँगको विद्युत व्यापार सम्झौताविरुद्ध दायर भएको रिटमा विहीबार सर्वोच्च अदालतमा सुनुवाइ शुरु भएको छ।

सर्वोच्चका न्यायाधीशहरू प्रकाशमान सिंह राउत, सपना प्रधान मल्ल र महेश शर्माको पूर्ण इजलासमा रिटमाथि सुनुवाइ शुरु भएको हो।

अख्तियार दुरुपयोग अनुसन्धान आयोगका पूर्व प्रमुख आयुक्त सूर्यनाथ उपाध्यायले वारेसमार्फत सर्वोच्चमा रिट निवेदन दायर भएको थियो। २०८० पुस १९ गते नेपाल र भारतबिच भएको दीर्घकालीन विद्युत् व्यापार सम्झौता संविधान र देशको हितविपरीत रहेको दाबी रिटमा गरिएको छ।

उपाध्यायले सन्धि ऐन, २०४७ को दफा ३ अन्तर्गत पूर्णाधिकार प्राप्त नगरी भारतसँग विद्युत व्यापार सम्झौता गरिएको दाबीसहित रिटमा खारेज गर्न माग गरिएको छ।

यसअघि भएको सुनुवाईमा न्यायाधीशद्वय डा.कुमार चुडाल र शारंगा सुवेदीको संयुक्त इजलासले उक्त रिटलाई पूर्ण इजलासमा पेस गर्न आदेश दिएको थियो।