ओलम्पिकको पदक तालिकामा चीन शीर्ष स्थानमा उक्लियो, जापान तेस्रो
पान झानलीको विश्व कीर्तिमानी प्रदर्शनसँगै चीन पदक तालिकामा शीर्ष स्थानमा पुगेको हो। चीनले ९ स्वर्ण, ७ रजत र ३ कांस्य पदक जितेको छ।
काठमाडाैं, साउन १७ : पेरिस ओलम्पिकको पदक तालिकामा चीन शीर्ष स्थानमा उक्लिएको छ। पान झानलीको विश्व कीर्तिमानी प्रदर्शनसँगै चीन पदक तालिकामा शीर्ष स्थानमा पुगेको हो। चीनले ९ स्वर्ण, ७ रजत र ३ कांस्य पदक जितेको छ।
झानलीले पुरुष समय मिटर फ्रि स्टाइलमा स्वर्ण जिते। आफ्नै विश्व कीर्तिमानमा ०.४० सेकेन्डको सुधार गर्दै १९ वर्षीय झानलीले ४६.४० सेकेन्डको नयाँ विश्व कीर्तिमान बनाएका हुन् ।
यस्तै आयोजक फ्रान्स भने ८ स्वर्ण, १० रजत र ८ कांस्यमा दोस्रोमा छ।
यता, लागतार शीर्ष स्थानमा रहेको जापान तेस्रो स्थानमा झरेको छ। उसले ८ स्वर्ण, ३ रजत र ४ कांस्य जितेको छ।
चौथो स्थानमा रहेको अस्ट्रेलियाको ७ स्वर्ण, ६ रजन र ३ कास्य छ भने पाँचौं स्थानको बेलायतले ६ स्वर्ण, ६ रजत र ५ कास्य पदक जितेको छ।
यस्तै, छैठौं स्थानको दक्षिण कोरियाले ६ स्वर्ण र समान २ रजत र कास्य जित्दा अमेरिका ५ स्वर्ण, १३ रजत र १२ कास्यसहित सातौं स्थानमा छ।
अहिलेसम्म २३ राष्ट्रले स्वर्ण जित्दा कुल ४१ देश पदक तालिकमा नाम लेखाएका छन्। दक्षिण एसियाबाट भारतले मात्र पदक जितेको छ। उसले सुटिङमा २ कास्य जितेको छ।
