पोखरामा विद्यार्थी बोकेको स्कुल बस दुर्घटना, आमा–छोराको मृत्यु, २८ जना घाइते

कस्की, साउन १४ : पोखरामा भएको स्कुल बस दुर्घटनामा आमा–छोराको मृत्यु भएको छ।

सोमबार बिहान पोखरा–२१ कृस्तीमा एलपी देवकोटा मेमोरियल विद्यालयको ग १ क ६२१९ नं. को विद्यार्थी बोकेको बस सडकबाट ५० मिटर तल खसेको थियो।

दुर्घटनामा विद्यालयकी कार्यालय सहयोगी ३३ वर्षीया आरती विक र उनका अन्दाजी ५ वर्षीय छोरा प्रिन्सको मृत्यु भएको प्रहरीले जनाएको छ।

आमा आरतीको घटनास्थलमै र गम्भीर घाइते प्रिन्सको गण्डकी मेडिकल कलेजमा उपचारका क्रममा मृत्यु भएको प्रहरीले जनाएको छ।

दुर्घटनामा २८ जना घाइते भएको बताइएको छ। उनीहरूको गण्डकी मेडिकल कलेज र मणिपाल शिक्षण अस्पतालमा उपचार भइरहेको छ।