सिमित स्रोत र जनशक्तिबाटै प्रभावकारी सेवा दिनुपर्छ : मन्त्री पौडेल

काठमाडौं, साउन १२ : स्वास्थ्य तथा जनसङ्ख्यामन्त्री प्रदीप पौडेलले स्वास्थ्य क्षेत्रमा सेवाको प्रभावकारीतालाई अझै बढाउन आवश्यक रहेको बताएका छन्।

शनिबार काठमाडौंमा आयोजित वीर अस्पतालको १३५ औं वार्षिकोत्सवका अवसरमा कार्यक्रममा बोल्दै उनले चिकित्सकीय जनशक्ति आजै उत्पादन गरेर बढाउन सक्ने स्थिति नरहेकाले सिमित चिकित्सकीय शक्ति, सिमित भौतिक पूर्वाधार, सिमित स्रोतकाबीचमा प्रभावकारी सेवा प्रदान गर्नुपर्ने बाध्यता रहेको बताए।

‘देश आर्थिक हिसाबले समस्यामा छ। स्रोत बढाउन सक्ने अवस्था छैन। सिमित स्रोतभित्र सत प्रतिशत परिणाम प्राप्त गर्नेगरी काम गर्नुपर्ने स्थिति छ। पूर्वाधार विकासमा आजकोभोलि नै केही भइ हाल्दैन। दिर्घकालिन योजना अनुसार विस्तारै काम हुन्छ,’ उनले भने, ‘तर सेवाको प्रभावकारिता भने बढाउनुपर्ने हाम्रो बाध्यता छ। चिकित्सकीय जनशक्ति आजै उत्पादन गरेर बढाइहाल्न सक्ने अवस्था छैन। सिमित जनशक्ति, भौतिक पूर्वाधारका लागि सिमित स्रोतका बीचमा प्रभावकारी सेवा प्रदान गर्नुपर्ने आवश्यकता छ।’

उनले वीर अस्पतालभित्रको सबै इकाईहरुको समन्वय र एकीकृत स्वास्थ्य प्रणाली विकासमा जरुरी रहेको औल्याए । व्यस्थापकीय पक्षमा सुधार गर्न सकेमा भइरहेको  साधन र स्रोतभित्र रहेरपनि राम्रो परिणाम दिन सकिने उनको विश्वास छ।

उनले अस्पतालको इमर्जेन्सी सेवामा नागरिकको गुनासो रहेको भन्दै सबैले नागरिकको गुनासो सम्बोधन गर्नुपर्ने बताए। उनले स्वास्थ्यकर्मीलाई काम गर्नका लागि सुरक्षित वातावरण निर्माणमा लागिपर्ने बताए।

मन्त्री पौडेलले स्वास्थ्य क्षेत्रको विकासका लागि वर्तमान सरकार गम्भीर रहेको भन्दै सबैको सहकार्यमा अघि बढ्ने प्रतिवद्धता जनाए।

स्वास्थ्य क्षेत्रमा आवश्यकता अनुसार दरबन्दी सिर्जना गर्नका साथै सेवा सुविधा विस्तार गर्ने उनको भनाइ छ।