आन्तरिक उत्पादनलाई कर नीतिमार्फत संरक्षण गर्दैछौं : अर्थमन्त्री

काठमाडौं, असार २१ : अर्थमन्त्री वर्षमान पुनले देशको आन्तरिक उत्पादनलाई कर नीतिमार्फत संरक्षण गर्ने सरकारको नीति रहेकोे बताएका छन्।

शुक्रबार काठमाडौंमा आयोजित नेपालको कृषिको रूपान्तरण कार्यक्रमलाई सम्बोधन गर्दै मन्त्री पुनले चालु बजेटमा आलु प्याजलगायतमा लगाएको भ्याट हटाई आन्तरिक उत्पादनलाई कर नीतिमार्फत संरक्षण गर्ने नीति लिएको बताए। त्यसले कृषिको आधुनिकीकरणमा योगदान पुग्ने विश्वास उनको थियो।

‘हामीले आफ्नो कृषिलाई संरक्षण गर्नुपर्छ भनेर अहिले बजेट मार्फत चालु बजेटमा भ्याट लगाईएको थियो। प्याज आलुका आदीमा तर यसपटक त्यो भ्याट हटाइयो। भ्याटको सिदान्त आन्तरिक र बाह्य जहाँ उपयोग हुन्छ त्यहाँ भ्याट लाग्ने कुुरा हुन्छ, तर त्यो हटाइयो,’ अर्थमन्त्री पुनले भने, ‘आन्तरिक उत्पादनलाई नीतिगत रुपले संरक्षण गर्ने कर नीतिमार्फत संरक्षण गर्ने नीति हो।’

सरकारले पाँच वटा रुपान्तरण क्षेत्रमध्ये आईटी क्षेत्रलाई अगाडि सारेको र गएको वर्ष ६६ अर्बको निर्यात गरिसकेकोमा यो वर्ष कम्तीमा पनि एक खर्ब निर्यात हुने उनको दाबी छ।

‘यो वर्ष हामीले पाँच वटा रुपान्तरण क्षेत्र मध्य आईटी क्षेत्रलाई अगाडि सारेका छौं । आईटी क्षेत्र गएको वर्ष ६६ अर्वको निर्यात भयो । यो वर्ष कम्तीमा पनि एक खर्ब निर्यात हुन्छ आईटी क्षेत्रको सेवा,’ उनले भने।

उनले कृषि औद्योगिकरणमा गएपनि कृषि क्षेत्रको सेवाबाट औद्योगिकरणमा जाने बाटो सहज नभएको उनको भनाई छ।

अर्थमन्त्री पुनले उत्पादनपछिको अनुदान व्यवहारिक हुने भन्दै विगतका अनुदान नीतिहरुको सदुपयोग नभएको धारणा राखे।