पूर्वअर्थमन्त्री खतिवडाले गरे बजेटको आलोचना

काठमाडौं, जेठ २० : पूर्वअर्थमन्त्री युवराज खतिवडाले सरकारले आर्थिक सुधारको वर्ष भनेर बजेटमा भनेको भएतापनि आयोग गठनको वर्ष हुने डर रहेको टिप्पणी गरेका छन्।

शनिबार काठमाडौंमा आयोजित बजेटपछिको अन्तरक्रिया कार्यक्रममा उनले आर्थिक क्षेत्रको समस्याको समाधान दिर्घकालीन हुनुपर्ने भन्दै बजेट सुरुवात गर्दा संरचनागत सुधारबाट सुरु गरेको हुनाले आर्थिक क्षेत्रको समस्यालाई सम्बोधन गर्न नसकेको बताए।

‘आयात निरन्तर घट्दै छ । त्यसैले राजस्वमा दवाव परेको छ। त्यसले व्यवसायीको आम्दानीमा प्रभाव पारेको छ। त्यसको समाधान त दिर्घकालीन हुनुपर्ने होला नि? बजेट सुरुवात गर्दा संरचनागत सुधारबाट सुरु गरेको छ,’ उनले भने, ‘समस्याको धेरै सम्बोधन भएको छैन। यसैपनि संरचना सुधारका कुराहरु धेरै हुन्छन्।’

उनले बाहिरबाट सुन आयात गरेर आफ्नो सीपलाई प्रयोग गरी गहना बनाएर निर्यात गर्ने कुरामा राष्ट्र बैक र अर्थ मन्त्रालयले सोच्न आवश्यक रहेको औंल्याए।

‘गहना बनाएर निर्यात गर्ने सुन चाँदीको हकमा आयात गर्न दिँदा हुन्छ । निर्यात हुने परिमाणको आधारमा आन्तरिक खपत भने कठिन हुन्छ । त्यो राज्यले धान्न सक्दैन्,’ उनले भने, ‘सुनको माग हाम्रो देशको देशको नागरिकको मात्र होइन् त्यसैले आफ्नो सीपलाई प्रयोग गरेर र मुल्य वृद्धि गरेर निर्यात गर्ने कुरामा राष्ट्र बैक र अर्थ मन्त्रालयले सोच्नुपर्छ।’