‘राजनीतिक अस्थिरताका कारण विकास निर्माणले गति लिन सकेन’

काठमाडौं, जेठ १० : सञ्चार तथा सूचना  प्रविधिमन्त्री रेखा शर्माले मुलुकमा राजनीतिक अस्थिरता पैदा भएको कारण विकास निर्माणका कामले गति लिन नसकेको बताएकी छिन्।

बिहीबार काठमाडौंमा राष्ट्रिय समाचार समितिद्धारा आयोजित ‘गणतन्त्रको उपलब्धि समृद्धिका लागि पूर्वाधार’ विषयक तस्बिर प्रदर्शनीको उद्घाटन समारोहलाई सम्बोधन गर्दै मन्त्री शर्माले अरु देशमा १०–१५ वर्ष एउटै पार्टीले सत्ता सञ्चालन गर्ने तर नेपालमा बढिमा एक–दुई वर्ष सत्ता टिक्ने कारणले विकास निर्माणका काम तिव्र गतिमा हुन नसकेको बताइन्।

‘हामीले अरु छिमेकी देहलाई हेर्ने हो भने अहिले दुई वटा देशमा निर्वाचन हुँदैछ। इन्डियामा १०–१५ वर्ष एउटै पार्टीले सत्ता सञ्चालन गर्ने गर्दछ। चीन हेर्ने हो भने त्यस्तै छ। हाम्रोमा ६ महिना, ८ महिना बढिमा एक–दुई वर्षका सरकारले जसरी कामको पहल कदमी लिइरहेका छन्, गणतन्त्रमा यो नै ठूलो कुरा हो,’ उनले भनिन्,‘हाम्रो राजनीतिक अस्थिरता शासकिय स्वरुपमा समस्या निर्वाचण प्रणालीमा गर्नुपर्ने समिक्षाको कारणले राजनीतिक अस्थिरता पैदा भएको छ। त्यसले विकास निर्माण तिब्र गतिमा हुन सकेको छैन्।’

उनले सार्वजनिक खरिद ऐनमा नै समस्या रहेको भन्दै यसको समाधान चाँडै गर्नुपर्ने बताइन्। समयमा काम सम्पन्न नगर्नेलाई सरकारले कानुनको दायरामा ल्याउनुपर्ने उनको भनाई छ।

‘अहिले समयमा विकासको काम भएका छैनन्, केही जटिलताहरु पनि देखिएका छन् । हाम्रो सार्वजनिक खरिद ऐनमा नै समस्या छ,’ उनले भनिन्, ‘त्यो कारणले समयमा काम नहुने समयमा काम नगरेकालाई सरकारले कानुनको दायरामा ल्याउन सकेको छैन्। यस्तो अवस्था सृजना भएको छ। तर हिजो भन्दा आज जनताले ढिलोहुँदा पनि खबरदारी गर्न पाइरहेका छन्।’

तस्बिर प्रदर्शनीमा मुलुकका तीनवटै तहका सरकारले आफ्नो सीप, जनशक्ति र पुँजी तथा छिमेकीका साथै अन्य मित्रराष्ट्रसमेतका सहायतामा निर्मित एवं निर्माणाधीन राष्ट्रिय तथा प्रादेशिक गौरवका आयोजनाका तस्बिर समावेश छन्।