दासढुंगा घटनाको गम्भीर खोजी आवश्यक छ : नेपाल

काठमाडौं, जेठ ३ : नेकपा एकीकृत समाजवादी (नेकपा एस) का अध्यक्ष माधवकुमार नेपालले दासढुंगा घटनाको गम्भीर खोजी आवश्यक भएको बताएका छन्।

बिहीबार मदन–आश्रितको ३१औं स्मृति दिवसका अवसरमा पार्टी कार्यालय आलोकनगरमा आयोजित कार्यक्रममा नेपालले जननेता मदन भण्डारीको सत्यतथ्य बाहिर ल्याउन समिति गठन गरेपनि अझै सत्यतत्य आउन नसकेको बताए। तत्कालीन समयमा भण्डारीको निधनले पार्टी पंक्तीमै निराशाले पलाको उनले बताए।

सताएको स्मरण गर्दै अध्यक्ष नेपालले भने, ‘घटनाको सन्दर्भमा सत्यतथ्य के हो अझै छानबिन गर्न बाँकी छ। तत्कालीन अवस्थामा पार्टीले तुरुन्त पहलकदमी लियो। त्यसपछि पद्मरत्न तुलाधरको नेतृत्वमा छानबिन कमिटी पनि बन्यो,’ उनले थपे, ‘त्यो छानबिन कमिटीको मात्रै रिर्पोटले पुगेन भनेर पार्टीले स्वयं केपी ओलीको नेतृत्वमा छानबिन कमिटी बनायो । त्यो कमिटीबाट कुनै खास कुराहरू आउन सकेन। त्यसैले यस सन्दर्भमा अझै गम्भीर खोजी गर्न आवश्यक छ।’

अध्यक्ष नेपालले दुर्घटनाको अन्तिम साक्षी अमर लामाको समेत हत्या रहस्यम ढंगले भएको बताउँदै नेकपा एमालेले त्यसको सत्यतथ्य छानबिन गर्न सहयोग गर्नुपर्ने बेला आएको बताए।

‘दुर्घटनाको अन्तिम साक्षी अमर लामालाई यो बीचमा मारियो। कीर्तिपुरमा गइरहेको बेला गोली हानेर मारियो। त्यो पनि रहस्यमय छ,’ उलने भने, ‘कुनै पार्टीसँग जोडिएका मान्छेले उनलाई मारेको भन्ने कुरा आएको छ । सम्बन्धित पार्टीले पनि के भएको हो भन्ने बारेमा छानबिनमा सहयोग गर्नुपर्ने आवश्यकता छ।’

यस्तै, सम्मानित नेता झलनाथ खनालले मदन–आश्रीतको दुर्घटना नभएर षणयन्त्रपूर्ण हत्या भएको तर्क गरे। उनले भने, ‘हामी दुर्घटना, दुर्घटना, दुर्घटना मात्र भन्दै हिँडेका छौं । ३० वर्ष भयो तर यथार्थमा भन्ने हो भने त्यो हत्या हो।’