संसदकाे बर्खे अधिवेशन सुरू

काठमाडौं, वैशाख २८ : संघीय संसदअन्तर्गत प्रतिनिधिसभा र राष्ट्रियसभाको बर्खे अर्थात् बजेट अधिवेशन सुरू भएकाे छ। सभामुख देवराज घिमिरेले औपचारिक रूपमा बैठक सुरू गरेका हुन्।

राष्ट्रपति रामचन्द्र पौडेलले नेपालको संविधानको धारा ९३ को उपधारा (१) बमोजिम मन्त्रिपरिषद्को सिफारिसमा यही वैशाख २० गते संसद्को दुवै सदनको अधिवेशन आह्वान गरेअनुरुप सदनको बजेट अधिवेशन प्रारम्भ भएकाे हाे।

नयाँबानेश्वरस्थित अन्तर्राष्ट्रिय सम्मेलन केन्द्रमा  दिनकाे २ बजेका लागि बैठक बाेलाइए पनि २ घन्टा ढिला गरी बैठक सुरू भएकाे हाे।

यस अधिवेशनको पहिलो बैठकमा आज राष्ट्रपति कार्यालयबाट प्राप्त पत्र र प्रधानमन्त्री कार्यालयबाट प्राप्त कार्यभार थप सम्बन्धी व्यहोराको पत्र सभामुख देवराज घिमिरेले पढेर सुनाउने सम्भावित कार्यसूची छ। सभामुख घिमिरेले बैठकको अध्यक्षता गर्ने सदस्यहरुको मनोनयनको जानकारी पनि गराउनेछन्।

यसै अधिवेशनमा आगामी आर्थिक वर्षको आयव्ययको अनुमानित विवरण (बजेट) जेठ १५ मा संसद्मा पेस गर्नुपर्ने संवैधानिक प्रावधान छ। त्यसअघि सरकारको वार्षिक नीति तथा कार्यक्रम दुवै सदनको संयुक्त बैठकमा राष्ट्रपतिबाट प्रस्तुत हुनेछ।