एक जना मन्त्री लिएर सरकार विस्तार गर्दै मुख्यमन्त्री कँडेल

कर्णाली, वैशाख १२ : कर्णाली प्रदेश सरकारका मुख्यमन्त्री यामलाल कँडेलले आज एकजना मन्त्रीसहित सरकार विस्तार गर्ने भएको छ।

नेकपा माओवादी केन्द्र कर्णाली प्रदेशसभा दलको आज बसेको बैठकले प्रदेशसभा सदस्य रनसिंह परियारलाई सरकारमा पठाउने निर्णय गरेसँगै सानो आकारमा मन्त्रिपरिषद् बिस्तार हुने भएको हो।

परियारलाई भोलि मुख्यमन्त्रीको विश्वासको मत लिनेगरी दलको बैठकबाट बिनाविभागीय मन्त्रीका रूपमा पठाइएको माओवादी केन्द्र कर्णाली प्रदेशसभा दलका नेता तथा निवर्तमान मुख्यमन्त्री राजकुमार शर्माले जानकारी दिए।

उनका अनुसार आर्थिक मामिला तथा योजना, सामाजिक विकास, उद्योग, पर्यटन, वन तथा वातावरण र जलस्रोत तथा ऊर्जा विकास मन्त्रालय माओवादी केन्द्रको भागमा परेको छ।

'सरकारमा नयाँ जाने वा पुरानै पठाइने भन्ने अहिले केही छैन,' उनले भने, 'बाँकी तीन मन्त्रीको टुंगाे लागेपछिको कुन हुने भन्ने निर्क्याेल हुन्छ।' एमाले कर्णाली प्रदेशसभा दलका प्रमुख सचेतक टेकराज पछाईले मुख्यमन्त्री कँडेलले भोलि विश्वासको मत लिइसकेपछि दलको बैठक बसेर मन्त्रीको टुंगाे लगाइने बताए।

'आज माओवादीले एक जना बिनाविभागीय मन्त्री भनेर रनसिंह परियारलाई पठाएको छ,' उनले भने, 'मुख्यमन्त्रीले विश्वास मत लिइसकेपछि सरकारले पूर्णता पाउनेछ।'