तस्बिरमा इदकाे उल्लास

काठमाडौं, चैत २९ : आज इस्लाम धर्मावलम्बीहरूले इद पर्व मनाउँदैछन् । एक महिना लामो रमजान पर्व (रोजा) पूरा भएको खुसीयालीमा इस्लाम समुदायले इद उल फित्र अर्थात् इद पर्व मनाउने गर्छन्। यस पर्वमा मस्जिदमा भेला भएर सामूहिक नमाज पढ्ने परम्परा छ । चन्द्रमाको गतिका आधारमा तय गरिने इद पर्व रमदान सकिएपछि सुरु हुने शुक्लपक्षमा पहिलोपटक चन्द्रमा देखिएपछि त्यसको भोलिपल्ट मनाउने परम्परा छ।

आजको दिन मुस्लिम धर्मावलम्बी आफू पवित्र भई सफा मस्जिद (इदगाह) मा गएर नमाज पढ्ने, एक आपसमा खुसीयाली साट्दै शुभकामना आदानप्रदान गर्ने प्रचलन छ। मुस्लिम समुदायका केटाकेटीदेखि बुढाबुढी मस्जिदमा गएर नमाज पढ्ने र आपसमा शुभकामना आदानप्रदान गरिरहेका छन्।

काठमाडौंको बागबजारस्थित जामे मस्जिदमा पनि बिहानैदेखि भिड लागेको छ। धार्मिक परम्परामा यो मुख्य पर्व भएको हुँदा नयाँ लुगा लगाउने, सेवइ (गहुँको पिठोबाट बनाइएको खाद्यवस्तु) को खिर र मिष्ठान्न परिकार खाने–खुवाउने चलन छ। पर्वका सन्दर्भमा सरकारले आज देशभर सार्वजनिक बिदा दिएको छ।