तनाव कम नभएपछि सुनसरीका दुई गाउँपालिकामा कर्फ्यु अवधि बढाइयो 

काठमाडौं, चैत २६ : तनाव कम नभएपछि सुनसरीका दुई गाउँपालिकामा जारी अनिश्चितकालीन कर्फ्यु आदेश पुनः थपिएको छ। 

जिल्ला प्रशासन कार्यालय सुनसरीले हरिनगर गाउँपालिका क्षेत्र र देवानगन्ज गाउँपालिका क्षेत्रमा अर्को सूचना जारी नभएसम्मलाई कर्फ्यु निरन्तर रहने सूचना जारी गरेको हो। शुक्रबारदेखि जारी गरिएको कर्फ्युलाई सोमबार पनि निरन्तरता दिइएको जिल्ला प्रशासन कार्यालय सुनसरीले जनाएको छ।

हिन्दु र मुस्लिम समुदाय झडपमा उत्रिएपछि  नियन्त्रणमा लिन शुक्रबारदेखि नै जिल्लाका विभिन्न स्थानमा कर्फ्यु जारी भएको थियो। कर्फ्यु आदेशमा सामाजिक, धार्मिक, राजनीतिक सभा, र्‍याली/भेला/प्रदर्शन गर्ने लगायतका कुनै पनि कार्यक्रम नगर्न/नगराउन भनिएको छ। 

प्रशासनले यसअघि इनरुवा नगरपालिका क्षेत्र, भोक्राहा नरसिंह गाउँपालिका क्षेत्र र कोशी गाउँपालिका क्षेत्रमा बिहान १० बजेसम्मका लागि कर्फ्यु जारी गरेको थियो।