भरतपुरलाई साइकल सिटी बनाउने अभियान सुरु

काठमाडाैं, चैत ९ : साइकल सिटीका रुपमा चितवनको भरतपुरलाई स्थापित बनाउने अभियान शुरु भएको छ।

भरतपुर भ्रमण वर्ष २०२४ को अवसरमा भरतपुरमा साईकल र्यालीको आयोजना गर्दै अभियानको शुरु गरिएको हो। हरेक बर्ष साइक्लिङ प्रतियोगिता गर्दै आएको प्रज्ञा स्मृति प्रतिष्ठानले तेस्रो संस्करणको रुपमा आयोजना गरिएको साइक्लिङ प्रतियोगिताको पूर्व सन्ध्यामा शुक्रबार चितवनको भरतपुरमा बृहत साइकल र्यालीको आयोजना गरेको छ।

नारायणगढस्थित नारायणी नदी किनारबाट शुरु भएको र्यालीको भरतपुर महानगरका प्रमुख रेनु दाहालले उदघाटन गर्नुभयो। सो अवसरमा प्रमुख दाहालले साइकल सिटिका रुपमा भरतपुरको पुरानो पहिचान फर्काउन महानगरले अभियान नै चलाएको बतायाे।

साईकल चलाऔं,वातावरण जोगाऔ,स्वस्थ रहौं भन्ने नारा सहित आयोजना गरिएको र्याली नारायणी नदी किनारबाट शुरु भई टर्मिनल, हामिकचोक, चौवीसकोठी, शहीदचोक, पुल्चोक हुदै पुनः नारायणी किनारमा पुगेर समापन भएको थियो।

चैत १० गते भरतपुरको गणेशस्थानबाट तेस्रो संस्करणको प्रज्ञा स्मृति साईक्लिङ एमटिबी क्रसकन्ट्री ओलम्पिक प्रतियोगिता आयोजना हुने कार्यक्रम संयोजक सन्तु दराईले जानकारी दिनुभयो। नेपाल साईक्लिङ संघ र चितवन साईकल राईडर्स क्लवको सहयोगमा प्रतियोगिता हुन लागेको हो। प्रतियोगितामा प्रथम, द्धितीय र तृतीय हुनेले क्रमशः ५० हजार,४० हजार र ३० हजार पुरस्कार प्राप्त गर्नेछन।