तेह्रथुममा आगलागीबाट १६ घर जले
गाउँका ५ वटा बस्ती जलाई सकेको आगो अन्य बस्तीतर्फ सल्किएको बताइएको छ। पानी नभएका कारण निभाउन समस्या भएको स्थानीयको भनाइ छ।
तेह्रथुम, चैत ४ : फेदाप गाउँपालिका-१ सिम्लेमा आइतबार अपरान्हदेखि सुरु भएको आगलागीमा परी ५ वटा बस्तीका १६ घर जलेका छन्।
गाउँको पुछारमा वनमा अपरान्ह १ बजे अचानक सुरु भएको आगो वनसँगै जोडिएका बस्तीमा सल्किएको छ। आगलागीका कारण अहिलेसम्म १६ वटा घर जलेको वडाध्यक्ष मनबहादुर श्रेष्ठले जानकारी दिए।
आगलागीमा परी सिम्लेका रातमाटे, बाँझीगरा, टाहारी, अम्फुवा र मयन्तपा गाउँ जलेका हुन्। बस्तीमा अहिले पनि आगो लागिरहेको छ।
आगो नियन्त्रणका लागि सदरमुकाम म्याङलुङबाट जनपथ र शसस्त्र प्रहरी पुगेको छ। स्थानीय र प्रहरीले संयुक्त रुपमा आगो नियन्त्रणको प्रयास गरिरहेका छन्।
५ वटा बस्ती जलाई सकेको आगो अन्य बस्तीतर्फ सल्किएको बताइएको छ। पानी नभएका कारण निभाउन समस्या भएको स्थानीयको भनाइ छ।
प्रकाशित मिति: १९:२५ बजे, आइतबार, चैत ४, २०८०
थप समाचार
