शरीरको तापक्रम नापेर सांसदलाई संसद भवनभित्र प्रवेश
काठमाडौं, चैत ६ : कोरोना भाइरस संक्रमणको जोखिमलाई ध्यानमा राखी संघीय संसद्ले पनि आजदेखि विशेष सावधानी अपनाउन सुरू गरेको छ।
स....
काठमाडौं, चैत ६ : कोरोना भाइरस संक्रमणको जोखिमलाई ध्यानमा राखी संघीय संसद्ले पनि आजदेखि विशेष सावधानी अपनाउन सुरू गरेको छ।
संघीइ संसद् भवन नयाँ बानेश्वरमा राष्ट्रियसभाको बिहीबारको बैठकमा सहभागी सांसदलाई चिकित्सकको टोलीले प्रारम्भिक स्वास्थ्य परीक्षण गरेर मात्र प्रवेश गराएको हो।
चिकित्सक टोलीले बैठकमा प्रवेश गर्नुपूर्व सांसदलाई तापक्रम मापन यन्त्र (टेम्प्रेचर गन)ले तापक्रम परीक्षण गरेर प्रवेश गराएको छ। सङ्घीय संसद्कै चिकित्सक टोलीले आजदेखि जाँच शुरु गरेको जनाइएको छ।
कोरोना भाइरस सङ्क्रमण रोकथाम तथा नियन्त्रण उच्चस्तरीय समन्वय समितिको बुधबार बसेको बैठकले सम्भावित जोखिमलाई ध्यानमा राखी विशेष सावधानी अपनाउन शैक्षिक संस्था बन्ददेखि, खेल मैदान, चलचित्रघर, हेल्थ क्लब, डान्सबार, स्विमिङ पुललगायतलाई आगामी वैशाख १८ सम्म बन्द गर्ने निर्णय गरेको थियो।
कुनै पनि ठाउँमा अत्यावश्यक कामबाहेक सार्वजनिकस्थल, सांस्कृतिक केन्द्र, पार्टी प्यालेसलगायत स्थलमा २५ भन्दा बढी भेला तथा जमघट हुन नदिने निर्णयसमेत गरेको थियो।
सरकारले सोही रोगको जोखिमलाई ध्यान दिँदै आजदेखि शुरु हुन लागेको एसइई परीक्षा तथा चैत महिनाभरमा सञ्चालन हुने सबै परीक्षा स्थगन गर्ने निर्णय गरेको थियो।
