भारतीय टाटासुमोले ठक्कर दिँदा दुई जनाको मृत्यु
महोत्तरी, फागुन २१: भारतीय टाटासुमोले ठक्कर दिँदा महोत्तरीमा दुईजनाको मृत्यु भएको छ भने एकजना घाइते भएका छन् ।
मृत्यु हुनेमा महोत्तरी पिपरा गाउँपालिका–५ का ६० वर्षीय अकवर राइन र धनुषा क्षिरेश्वरनाथ नगरपालिका–१ का ६० वर्षीय राजकिशोर यादव रहेको प्रहरीले जानकारी दिएको छ ।
महोत्तरीको मटिहानी जनकपुर सडकखण्डमा जनकपुरबाट मटिहानीतर्फ गइरहेको बीआर ०६ पीडी ३३३० नम्बरको टाटासुमोले गएराति पिपरा–१ स्थित सडकखण्डमा पिपराबाट मटिहानतिर जाँदै गरेको मधेश प्रदेश ०१ त ३००९ नम्बरको ट्याक्टरलाई ठक्कर दिएको थियो । ठक्करबाट ट्र्याक्टरमा पछाडि बसेका राइनको मृत्यु भएको थियो । सोही क्रममा टाटासुमोले विपरित दिशाबाट साइकलमा आउँदै गरेका यावदलाई पनि ठक्कर दिएपछि उनको पनि मृत्यु भएको हो ।
सोही टाटासुमोको ठक्करबाट ट्याक्टरमा सवार पिपरा–५ का ६० वर्षीय झप्सी कवाडी गम्भीर घाइते भएका थिए । उनको प्रादेशिक अस्पताल जनकपुरमा उपचार भइरहेको जनाइएको छ ।
टाटासुमो पनि मटिहानी –४ स्थित सडक छेउमा पल्टिएर दुर्घटना भएको र चालक फरार रहेको प्रहरीले जनाएको छ ।
