आगामी बजेट उत्पादन वृद्धि र रोजगारी सिर्जनामा केन्द्रित हुन्छ : प्रधानमन्त्री

काठमाडौं, माघ २६ : प्रधानमन्त्री पुष्पकमल दाहालले आगामी आर्थिक वर्षको बजेट उत्पादन वृद्धि र रोजगारी सिर्जनामा केन्द्रित हुने बताएका छन्।

आठौं नुवाकोट महोत्सवलाई आज सम्बोधन गर्दै उनले कृषि उत्पादन वृद्धि हुनेगरी बजेट निर्माण गरिने स्पष्ट पारे।

राष्ट्रिय बजेट प्रणालीमा आमूल परिवर्तन गर्ने प्रक्रिया अघि बढेको जानकारी दिँदै प्रधानमन्त्री दाहालले परम्परागत बजेट प्रणालीलाई रुपान्तरण गरिने बताए।

सरकारको नीति तथा कार्यक्रम र बजेट निर्माणका लागि सबै क्षेत्रसँग छलफल गर्ने तथा सुझाव लिने काम भइरहेको उनको भनाइ थियो। बजेट निर्माण प्रक्रिया अगाडि बढेको जानकारी दिँदै उनले आगामी आवको बजेटले मुलुकको रुपान्तरण गर्ने विश्वास दिलाए।
 
मुलुकको अर्थतन्त्र विस्तारै लयमा आउन थालेको उनले उल्लेख गरे। ‘अर्थतन्त्रका सूचक धेरै उत्साहजनक रहेका छन्, विदेशी मुद्राको सञ्चिती तथा पर्यटकको आगमनमा वृद्धि भएको छ, यसले अर्थतन्त्रलाई सही बाटोमा ल्याउन मद्धत गरेको छ, पछिल्लो समय राजस्वमा पनि वृद्धि भएको छ,’ प्रधानमन्त्री दाहालले भने।

प्रधानमन्त्री दाहालले धार्मिक, ऐतिहासिक, कृषि, पर्यटन व्यवसाय र कला संस्कृतिको विकासमा सरकारले सहयोग गर्ने बताए। उनले नुवाकोट दरबारको पुनःनिर्माणमा सरकारले ध्यान दिने बताए ।