तत्काल सवा अर्ब भुक्तानी गरे एक हप्ताभित्रै इटालीयन कम्पनी फर्किने 

काठमाडौं, फागुन १० : मेलम्ची खानेपानी आयोजनाको मुख्य ठेकेदार इटालीयन कम्पनी सिएमसी दि रेभेनाले काम छोडेर बाहिर गएदेखि भएको नोक्सानी बराबरको रकम भुत्तानी गरे नेपाल फर्कने सरकारलाई औपचारिक पत्र पठाएको छ । सिएमसीले आफुले साइट छोडेर गएको मिति गत डिसेम्बर १७ देखि हालसम्म काम गर्दा हुन आउने रकम माग गर्दैै नेपाल सरकारले तत्काल भुक्तानी गरे नेपाल फर्किने बताएको हो ।

खानेपानी मन्त्रालय स्रोतका अनुसार आयोजनाले भुक्तानी नदिएका कारण बाध्य भएर फर्किएको हुँदा यो बीचमा काम गर्दा हुने आम्दानीको समेत सिएमसीले माग गरेको हो । 

“सिएमसीले हालसम्म भएको नोक्सानी वापत करिब ९० करोड र पहिलाको बक्यौता ३६ करोड भुक्तानी गरे ७ दिनभित्र काम सुचारु गर्ने भनी चिठी पठाएको छ,” स्रोत भन्छ, “यसमा सरकार पनि सकारात्मक रहेको छ ।” 

सिएमसीले आफुले अब थप नगद प्रवाह (क्यास फ्लो) गर्न नसक्ने भएकाले नेपाल सरकारले नै त्यसको ग्यारेन्टी गर्नुपर्ने (मागेको समयमा भुक्तानी दिनुपर्ने गरी) र नेपाल फर्किनका लागि कम्पनीका कामदारलाई सुरक्षाको ग्यारेन्टीसमेत हुनुपर्ने माग राखेको छ ।

सिएमसीलाई नै फर्काउँदा लक्ष्यअनुसार काम हुने हुँदा उसलाई फकाएर भएपनि फर्काउन खानेपानी मन्त्री बिना मगर लागिरहेकी छिन् । स्रोतका अनुसार सिएमसी फर्काउन मेलम्ची आयोजनाका अध्यक्ष रहेका नयाँ सचिव दिपेन्द्रनाथ शर्मा पनि सकारात्मक रहेको हुँदा सिएमसी फर्किन सक्ने सम्भावना बढेको छ ।

याे पनि पढ्नुहाेस् : मेलम्ची आयोजना + सीएमसी कम्पनी = काठमाडौंवासी

खानेपानी मन्त्री बिना मगरले शुक्रबार संसदमा मेलम्चीबारेका प्रश्नको जवाफ दिंदै काठमाडौंवासीले छिटोभन्दा छिटो पानी पाउनका लागि सिएमसी नै फर्काउनुपर्ने बताएकी छिन् । उनले मेलम्ची आयोजनाबारे आफ्नो सूत्र सार्वजनिक गर्दै भनेकी छिन्, ‘मेलम्ची आयोजना प्लस सीएमसी कम्पनी बराबर काठमाडौंवासी’ ।

गत डिसेम्बर १९ तारिखमा एकतर्फी रुपमा ठेक्का तोडेर घर फर्किन लागेका सिएमसीका कर्मचारीलाई  तत्कालिन खानेपानी सचिव गजेन्द्र ठाकुरसहितको प्रहरी टोली होटल पुगेर पक्राउ गरिएको थियो ।

पक्राउपछि गरिएको सम्झौतामा नयाँ वर्षपछि काममा फर्किने बताए पनि सुरक्षाको ग्यारेन्टी नभएको भन्दै सिएमसीले आफ्ना कामदार नेपाल पठाउन मानेको छैन ।

सिएमसी फर्काउन सवा अर्ब तिर्नुपर्ने
अहिले सरकारले सिएमसीले भुकम्पलगायत विभिन्न समयमा भएको प्राकृतिक क्षति बराबर दावी गरेको पहिल्यै दिनुपर्ने ३६ करोड, त्यसअघिको कामको भुक्तानी गर्न बाँकी १५ करोड छ भने डिसेम्बर महिनाको १६ तारिखसम्म काम गरेको रकम करिब १० करोड हुन आउने इञ्जिनियरहरु बताउँछन् । यसैगरी कम्पनी “ब्याक” भएपछिको समयमा काम गरेको भए हुन आउने आम्दानी बराबर दाबी गरेको ९० करोड पनि तत्काल भुक्तानी गर्नुपर्ने देखिन्छ ।

यसरी हेर्दा सरकारले सिएमसीलाई करिब १ अर्ब ८० करोड रकम भुक्तानी गर्नुपर्ने छ । तर, तत्काल पहिलेको ३६ करोड र अहिले माग गरेको ९० करोड भुक्तानी गरे एक हप्ताभित्र काम सुरु गर्ने सिएमसीको शर्त रहेको मन्त्रालय स्रोतले बताएको छ ।

यसैबीच सिएमसीले नेपाली ठेकेदार तथा व्यवसायीलाई तिर्नुपर्ने सवा १ अर्ब रकम भुक्तानी नगरी अरु कुनै पनि ठेकेदारलाई साइटमा जान नदिने चेतावनी दिएका छन् । सिएमसीसँग काम गरेको स्थानीय ठेकेदार कम्पनी मेघा टेक हाइड्रो एण्ड इन्फ्रास्ट्रक्चर प्रालिका कार्यकारी अध्यक्ष श्रीराम न्यौपानेले आफ्नो भुक्तानी नदिएसम्म कुनै पनि हालतमा अर्को कम्पनीलाई साइटमै जान नदिने बताएका छन् । 

काठमाडौं प्रेससँगको कुराकानीमा उनले भने, “हामीले बुझेअनुसार सचिव गजेन्द्र ठाकुरका कारण सिएमसी घर फर्केको हो । यदि सिएमसी यहाँ पुनः काम गर्न आएमा हामी सरकारसँग भुक्तानी माग्दैनौं तर उसको मुद्दा टुङ्गो नलगाइ अर्को कम्पनी साइटमा कुनै पनि हालतमा लानै मिल्दैन र लान पनि सक्दैन ।”