धादिङमा ट्रक दुर्घटना, चालकको मृत्यु

काठमाडौं, फागुन ११ : धादिङको बेनिघाट रोराङ गाउँपालिका ९ ज्यामिरेघाटमा सिमेन्ट बोकेको ट्रक दुर्घटना हुँदा चालकको मृत्यु भएको छ । दुर्घटनामा मकवानपुरको भैंसे बस्ने ४६ वर्षीय बिखे थोकरको मृत्यु भएको हो।

दुर्घटनामा घाइते भएका थोकरको गजुरी अस्पतालमा उपचारको क्रममा आइतबार मृत्यु भएको जिल्ला प्रहरी कार्यालय धादिङका प्रवक्ता रूपक खड्काले बताए।

सिमेन्ट बोकेर वीरगञ्जबाट बनेपा जाँदै गरेको ना ५ ख ३७७७ नम्बरको ट्रक आइतबार बिहान करिब सवा तीन बजे त्रिशुली नदीमा खसेको थियो । टायर पड्किएपछि ट्रक अनियन्त्रित भएर सडकबाट करिब एक सय मिटर तल खसेको प्रहरीले जनाएको छ।

दुर्घटनामा सहचालक सप्तरीको रुपनगर बस्ने राजेश विक घाइते भएका छन् । उनको गजुरी अस्पतालमा उपचार भइरहेको छ । उनको अवस्था सामान्य रहेको धादिङ प्रहरीले जनाएको छ।