बाग्लुङमा जन्ती सवार ट्याक्टर दुर्घटना, तीन जनाको मृत्यु

बाग्लुङ, माघ २४ : बाग्लुङको तमानखोला गाउँपालिका–३ बुलबुलेमा जन्ती सवार ट्याक्टर दुर्घटना हुँदा ३ जनाको मृत्यु भएको छ।

गएराति म्याग्दीको मालिकाबाट बाग्लुङ जाँदै गरेको  ग १ त ५७६२ ट्रयाक्टर बुलबुलेमा दुर्घटना भएको जिल्ला प्रहरी कार्यालयले जनाएको छ। दुर्घटनामा म्याग्दीको मालिका गाउँपालिका–२ की २१ वर्षीया रीता पुन, ५२ वर्षीया मनकुमारी पुन र ५७ वर्षीय ओम प्रकाश पुनको मृत्यु भएको प्रहरीले जनाएको छ।

जिल्ला प्रहरी कार्यालयका अनुसार, उनीहरूको घटनास्थलमै मृत्यु भएको हो। दुर्घटनामा ९ जना घाइते भएका छन्। उनीहरूको स्थानीय अस्पतालमा उपचार भइरहेको छ। गम्भीर घाइते रहेका तीन जनाको पाल्पास्थित मिसन अस्पतालमा उपचार भइरहेको प्रहरीले जनाएको छ।

प्रहरीका अनुसार, ट्रयाक्टरमा ३५ जना जन्ती सवार रहेका थिए। घुम्तीमा ट्रयाक्टर मोड्न नसकेपछि दुर्घटना भएको जनाएको छ। प्रहरीले चालकलाई नियन्त्रणमा लिएको छ।