बेथानचोक गाउँपालिका- ३ लाई निःशुल्क शिक्षा कार्यान्वयन वडा घोषणा 

काठमाडौं, जेठ ३० : बेथानचोक गाउँपालिकाको वडा नं. ३ लाई सोमबार एक कार्यक्रम बीच “अनिवार्य तथा निःशुल्क शिक्षा कार्यान्वयन वडा” घोषणा गरिएको छ ।

काभ्रेपलाञ्चोक जिल्ला बेथानचोक गाउँपालिका वडा नं. ३ मार्फत मिति २०८० जेष्ठ १४ गते देखि १७ गते सम्म संकलन गरिएको विद्यालय बाहिर रहेका ४ वर्ष पूरा भई १३ वर्ष पूरा नभएका बालबालिकाको वैयक्तिक विवरण ५ सय ५० घरधुरीमा संकलन गर्दा वडा भित्रका कुनै पनि बालबालिकाहरु विद्यालय बाहिर नरहेको पाईएकाले “अनिवार्य तथा निःशुल्क शिक्षा कार्यान्वयन वडा” घोषणा गरिएको  हो ।

गत जेष्ठ २६ गते शुक्रबार बसेको वडा समितिको निर्णय र वडा अध्यक्ष श्री कुबेर ढकालज्यूको प्रस्ताव अनुसार आज मिति २०८० साल जेष्ठ २९ गते सोमबारका दिन अनिवार्य तथा निःशुल्क शिक्षा कार्यान्वयन वडा घोषणा गरिएको गाउँपालिकाल् जनाएको छ ।

कार्यक्रमलाई सम्बोधन गर्दै गाउँपालिका अध्यक्ष भगवान अधिकारीले कुनै पनि बालबालिका शिक्षाबाट बञ्चित हुन नपरोस् भन्ने उद्देश्यका साथ सञ्चालित अनिवार्य तथा निःशुल्क शिक्षा गाउँपालिकामा लागू गरिएको र बाँकी सबै वडाहरुमा पनि अभियानले सार्थकता पाई गाउँपालिका नै अनिवार्य तथा निःशुल्क शिक्षा कार्यान्वयन घोषणा गरिने बताए ।

कार्यक्रममा ३ नं. वडा अध्यक्ष कुवेर ढकालले विद्यालय भर्ना नभएका, अपाङ्गता भएका, अभिभावकविहीन, गरिबी वा अन्य कुनै कारण हालसम्म विद्यालय नपुगेका बालबालिकालाई विद्यालयसम्म ल्याउने नीतिअनुसार गाउँपालिकाले उक्त कार्यक्रम लागू गरेकोमा वडामा सर्वेक्षण गरिएको उनको भनाई थियो ।

कार्यक्रममा बेथानचोक गाउँपालिका उपाध्यक्ष तारा राना तिमल्सिना, शिक्षा शाखा प्रमुख पुष्पा राई, तथ्यांक संकलकहरु, उपचारतात्मक शिक्षकका शिक्षिकाहरु, बाल सञ्जाल, बडास्तरीय बाल क्लब, विद्यालय प्रतिनिधि, वडा स्वास्थ्य इकाईका कर्मचारी, दलीय प्रतिनिधिलगायतको उपस्थिति रहेको थियो ।

गाउँपालिकाले नयाँ शैक्षिक सत्र सुरू हुने समय तथा नयाँ भर्नाका लागि गरिने घरदैलो कार्यक्रममार्फत विभिन्न कारण विद्यालय नपुगेका बालबालिकाको सूक्ष्म ढङ्गले लगत सङ्कलन गरेको थियो ।