दुध बेच्न हिँडेकी मनमायाकाे क्रसरबाट निस्केको टिपरले किचेर मृत्यु

गोरखा, माघ १७ : गोरखामा शुक्रबार बिहान टिपरले किचेर एक जनाको मृत्यु भएको छ। आक्रोसित स्थानीय वासिन्दाले दर्जनौं टिपर र एक्जाभेटरमा तोडफोड र आगजनी गरेका छन्।

गोरखा नगरपालिका–१० गोरखकाली क्रसर परिसरमा ग १ ख ८०२७ नम्बरको टिपरले किचेर गोरखा नगरपालिका–१० अमलापानीकी ५२ वर्षीया मनमाया तामाङको मृत्यु भएको हो। उनको घटनास्थलमै मृत्यु भएको प्रहरीले जनाएको छ।

घरबाट छेपेटार बजारमा दुध बेच्न हिँडेकी मनमायालाई शुक्रबार बिहान पौने ७ बजे क्रसरबाट निस्केको टिपरले किचेको जनाएको छ।

उनको मृत्युपछि स्थानीय वासिन्दाले प्रदर्शन गरेका छन्। उनीहरूले टिपरमा आगजनी गरेका छन्। त्यस्तै, त्यहाँ रहेका क्रसर र एक्जाभेटरमा तोडफोड गरेका छन्।

स्थिति नियन्त्रणमा लिन प्रहरी परिचालन गरिएको छ। अहिले क्रसर उद्योगभित्र प्रहरीले सुरक्षा दिइरहेका छन्। स्थानीय वासिन्दाले चालकलाई कारबाही र पीडित परिवारलाई राहतको माग गरेका छन्।