बिस्केट जात्राका अवसरमा टोखा नगरपालिकामा आज सार्वजनिक बिदा

काठमाडौं, वैशाख ४ : बिस्का अर्थात् बिस्केट जात्राका अवसरमा आज काठमाण्डौको टोखा नगरपालिकामा सार्वजनिक बिदा छ ।

टोखा नगरपालिकाको दशौँ कार्यपालिकाको बैठकले हरेक वर्ष मनाइने टोखाको ऐतिहासिक पर्व बिस्केट जात्राको उपलक्ष्यमा आज सार्वजनिक बिदा दिने निर्णय गरेको नगरपालिकाका मेयर प्रकाश अधिकारीले जानकारी दिए । 

बिस्केट जात्राको उपलक्ष्यमा टोखा नगरपालिकाभित्रका वडा कार्यालय तथा स्वास्थ्य संस्था, विद्यालय बन्द हुने उहाँले बताउनुभयो । काठमाण्डौ उपत्यकाको सबैभन्दा पुरानो जात्रा मानिने टोखाको बिस्केट जात्राको ऐतिहासिक महत्त्वसमेत रहेको छ ।

सामाजिक सद्भावका साथ मनाइने टोखाको बिस्केट जात्रामा विशेष खटमा सजाइएका गणेश, कुमारी, सपनतीर्थ, मसानकाली र चण्डेश्वरी लगायतका देवीदेवतालाई नारायण पोखरीमा स्नान गराउने चलन रहेको छ । गएको शुक्रवार १ गतेदेखि सुरु भएको बिस्केट जात्रा भोलि सकिँदैछ।