प्रचण्डलाई विष्णु पौडेलको प्रश्न–  फर्किनुथियो भने पुस १० गते किन बालकोट जानुभएको ? 

काठमाडौं, चैत ६ : नेकपा एमालेका उपाध्यक्ष तथा सांसद विष्णु पौडेलले प्रधानमन्त्री पुष्पकमल दाहाललाई एमालेसँगको सहमति तोड्नुको कारण सोधेका छन् । 

प्रधानमन्त्री प्रचण्डले प्रतिनिधि सभामा राखेको विश्वासको प्रस्तावको छलफलमा बोल्दै उपाध्यक्ष पौडेलले मुलुकको प्रधानमन्त्रीले गरेको सहमतिको मूल्य हुने कि नहुने भन्दै प्रधानमन्त्रीलाई प्रश्न गरेका हुन् ।  

‘प्रधानमन्त्रीले एउटा दलसँग गर्नुभएको सहमति राष्ट्रिय सहमति हुने, जुन दलको समर्थनमा उहाँले प्रधानमन्त्रीको हैसियत प्राप्त गर्नुभएको छ, त्यो दलसँगको सहमति चाहीँ सहमति नहुने ? सहमतिको परिभाषा यही हो ?,’ उनले भने ।

उनले प्रधानमन्त्री बन्नका लागि प्रचण्डले गरेको सहमति तोडेर पुरानै समिकरण जानुको कारण इतिहासले बारम्बार सोधिरहने पनि बताए ।  

‘प्रधानमन्त्री बन्नका निम्ति तपाइँले जुन सहमति गर्नुभएको थियो, के त्यस्तो परिस्थिती सिर्जना भयो कि त्यो सहमतिबाट तपाईँ पछि हटेर फेरि यो खालको सहयात्रा आरम्भ गर्दै हुनुहुन्छ ? यो सहयात्रामा जानु थियो भने १० गते बालुवाटारबाट किन निस्केर बालकोट जानुभएको ?,’ उनले भने,‘ तपाईँलाई इतिहासले सोध्छ र बालुवाटारबाट बालकोट किन जानुभयो, बालकोटको समर्थनमा किन प्रधानमन्त्री बन्नुभयो ? र दूई महिना पनि समय वित्दानबित्दै तपाईँ फेरि यो पुरानो समिकरणमा किन फर्किनुभयो ? इतिहासले तपाइँलाई यो प्रश्न सोधिरहन्छ र यो प्रश्नको जवाफ नदिई सुख पाउनुहुन्न ।’