वेल्डिङ कम्पनीमा  विस्फोट हुँदा दुईजनाको मृत्यु, तीन घाइते

वासिङ्टन, फागुन १० : फ्लोरिडाको एउटा वेल्डिङ कम्पनीमा मङ्गलबार भएको विस्फोट र आगलागीमा परी दुई जनाको मृत्यु भएको छ भने अन्य तीन जना घाइते भएका छन्। 

मियामीको डेड काउन्टीस्थित मेडलेमा रहेको उक्त कम्पनीमा विस्फोट हुँदा दुई जनाको घटनास्थलमा मृत्यु भएको सुरक्षा अधिकारीहरूले बताएका छन्।

दुर्घटनाको छानबिन भइरहेको मियामी डेड प्रहरी विभागले जनाएको छ। गत सोमबार ओहायो राज्यको बेडफोर्डस्थित धातु उत्पादन कारखाना विस्फोटको एक दिनपछि  उक्त दुर्घटना भएको हो। 

सोमबारको विस्फोटमा  एक जनाको मृत्यु भएको थियोभने १३ जना घाइते भएका थिए। विस्फोटबाट सुम्यानको भौतिक संरचनामा व्यापक क्षति हुनाका साथै बेडफोर्ड वरपरको वायुमण्डल प्रदूषित भएको थियो।