तुलसीपुरमा भोट हालेर घर गएकालाई फेरि बोलाएर मतदान सुरु गरिने 

काठमाडौं, मंसिर ४ : दाङको तुलसीपुरमा रोकिएको मतदान फेरि सुरुवातबाटै मतदान हुने भएको छ ।  

आइतबार बिहान तुलसीपुर–१० को पातुबनगाउँको मतदान केन्द्रमा कर्मचारीको गल्तीका कारण स्थगित भएको मतदान पुनः सुरुदेखि नै हुने भएको हो ।

मतदान केन्द्रका कर्मचारीले सय वटाको बन्डल पठाउँदा सबै प्रदेश सभाको मतपत्र मात्रै पठाइएको थापा पाएपछि मतदान स्थगित भएको  थियो । 

गल्ती थाहा पाउने बेलासम्म ४२ जनाले मतदान गरिसकेको बताइएको छ । छलफलपश्चात पुनः मतदान सुरु गर्ने सहमति भएको हो ।

भोट हालेर घर गएकाहरुलाई फेरि बोलाएर मतदान सुरु गरिने मतदान अधिकृत पुष्पलता घर्तीले जानकारी दिइन् । उनका अनुसार मतदान दिउँसो १ बजे सुरु हुने छ ।