नवलपरासीमा सेनाको बस दुर्घटना, ३० जना घाइते

कावासोती, मंसिर २८ :  नवलपरासीको कावासोती नगरपालिका–३ मा नेपाली सेना सवार बस बिहान दुर्घटना हुँदा ३० जना घाइते भएका छन्। 

सुर्खेत पृतनादेखि काठमाडौँ  छाउनीका लागि छुटेको  ना ६ ख ४०४ नम्बरको बस अनियन्त्रित भई भएर पल्टिएको हो। बस राजमार्गदेखि १० मिटर तल खसेको र घाइतेमध्ये केहीको अवस्था गम्भीर रहेको जिल्ला प्रहरी कार्यालय नवलपरासीपूर्व नवलपुरका प्रहरी निरीक्षक अर्जुन अधिकारीले जानकारी दिए।  

दुर्घटनामा परी घाइते भएका १८ जनाको कावासोतीस्थित नवलपुर अस्पताल र १२ जनाको मध्यविन्दु जिल्ला अस्पतालमा उपचार भइरहेको प्रहरी निरीक्षक अधिकारीले जानकारी दिए। बसमा ४० नेपाली सेना थिए ।