नेप्से परिसूचकमा उच्च अंकको वृद्धि

काठमाडाैं, साउन ९ : धितोपत्र बजारमा सेयर कारोबार मापक नेप्से परिसूचक आज पनि उच्च अंकले उकालो लागेको छ। चालु आर्थिक वर्षको मौद्रिक नीति सार्वजनिक भएपछि आइतबार पनि नेप्से परिसूचक उच्च अंकले बढेको थियो।

बजारले आज पनि सोही लय पछ््याउँदै अगाडि बढेको छ। नेपाल स्टक एक्सचेञ्जका अनुसार नेप्से परिसूचक ५४.४५ अंकले उकालो लागेर दुई हजार १३२.९६ मा पुगेको छ। यस्तै ठूला कम्पनीको सेयर कारोबार मापन गर्ने सेन्सेटिभ परिसूचक ९.०५ अंकले उकालो लागेर ४०७.३८ मा पुगेको छ।

कूल २१४ कम्पनीका ९९ लाख ४४ हजार ४८ कित्ता सेयर रु चार अर्ब १० करोड ६८ लाख १८ हजार ९४१ मूल्यमा खरिद बिक्री भए। यसबाट नेप्से परिसूचक र कारोबार रकममा वृद्धि भएको देखिन्छ। कारोबार भएका कूल १३ उपसमूहकै सेयर मूल्यमा वृद्धि भएको छ।

नेप्सेका अनुसार बैंकिङ २१.५१, व्यापार ५०.३८, होटल तथा पर्यटन ७५.६७, विकास बैंक २१३.३८, जलविद्युत् १०७.१३, वित्त १३८.१९, निर्जीवन बीमा १२५.७७, उत्पादन १७०.०९, अन्य १४.३९, लघुवित्त १८५.९८, जीवन बीमा २१०.७९, सामूहकि लगानी कोष ०.१ र लगानी १.७४ अंकले उकालो लागेको छ।

सोमबारको कारोबारपछि बजार पुँजीकरण रु ३० खर्ब ४५ अर्ब ७३ करोड ५९ लाख ९८ हजार ३७७ बराबर पुगेको छ। कारोबारका आधारमा शिवम् सिमेन्ट शीर्ष स्थानमा छ। सो कम्पनीको रु १५ करोड २९ लाख २५ हजार ६७८ बराबरको कारोबार भयो।

यस्तै अरुण काबेली पावर रु १४ करोड ५१ लाख १५ हजार ३४२, नेपाल दूरसञ्चार कम्पनी रु ११ करोड ५१ लाख सात हजार ४०५, हिमालयन डिस्टिलरी रु ११ करोड ४९ लाख ८४ लाख ३१४ र माथिल्लो तामाकोशी रु १० करोड ६० लाख ३१ हजार ६९५ बराबरको कारोबार भई शीर्ष पाँचभित्र पर्न सफल भए।

सात कम्पनीको सेयर मूल्यमा १० प्रतिशतले वृद्धि भएको छ। आजको कारोबारमा ती कम्पनीको सेयर मूल्यमा सकारात्मक सर्किट लागेको छ। नेप्सेका अनुसार नारायणी डेभलपमेन्ट बैंक, मल्टीप्रपोज फाइनान्स, सूर्योदय बोमी लघुवित्त, ग्रनि डेभलपमेन्ट, युनाइटेड मोदी हाइड्रोपावर, मानुषी लघुवित्त, बलेफी हाइड्रोपावरको सेयर मूल्यमा १० प्रतिशतले वृद्धि भयो। यस्तै कूल १८ कम्पनीको सेयर मूल्यसमेत नौ प्रतिशत बढीले वृद्धि भएको छ।

त्यस्तै मन्जुश्री फाइनान्स ५.८७, कुमारी बैंकको ऋणपत्र ३.९०, सिभिल बैंकको ऋणपत्र २.१८, सानिमा लार्ज क्याप २.०७ र लक्ष्मी उन्नती कोषका लगानकिर्ताले दुई प्रतिशतले गुमाएका छन्।