कारागारको १२ फिट अग्लो पर्खाल नाघेर भागे कैदी

मकवानपुर, मंसिर १ : कारागारको घेरबार नाघेर गएराति एक कैदी फरार भएका छन्।

मकवानपुरको भीमफेदी कारागारबाट कर्तव्य ज्यान मुद्दामा जन्मकैदको सजाय काटिरहेका ३० वर्षका कुलदीपराज धामी फरार भएका हुन्। कारागारका जेलर प्रकाश खनालले कैदीलाई भगाउन कसैको सहयोग रहेको आशङ्का गरे।

कारागार वरिपरि १२ फिटभन्दा अग्लो पर्खाल रहेकाले नाघेर भाग्न एक्लैले सम्भव नरहेको उनको भनाइ छ। ‘कसैको सहयोगमा पर्खाल नाघेर भागेको हुनुपर्छ, अनुसन्धान भइरहेको छ,’ उनले भने।

उनको खोजी भइरहेको जनाएको छ। उनको स्थायी घर चितवन र पुरानो ठेगाना सुनसरीमा समेत ‘अर्लट’ गरिएको जेलर खनालले बताए।

कारागारमा रहेका कैदीहरूको आन्तरिक प्रशासनले राति पौने १० बजे आफूलाई खबर गरेपछि मात्रै थाहा भएको उनको भनाइ छ। तत्कालै खोजी सुरू गरिएको जनाएको छ।

जिल्ला अदालतबाट कर्तव्य ज्यान मुद्दामा २० वर्ष जेल तोकिएका कुलदीप पाँच वर्षदेखि सजाय काटिरहेका थिए।