साउदीका युवराज र इराकका प्रधानमन्त्रीबीच भेटवार्ता

रियाद, असार १३ : साउदी अरबका युवराज मोहम्मद बीन सल्मान अल साउद र इराकका प्रधानमन्त्री मुस्ताफा अल काधिमीका बीचमा भेटवार्ता भएको छ ।  

दुई देशको सम्बन्ध तथा आपसी सहकार्यका बारेमा उनीहरुले आइतबार छलफल गरेको अधिकारीहरुले जनाएका छन्। साउदी अरबको भ्रमणमा रहेका काधिमीले साउदीका उपप्रधानमन्त्री तथा रक्षा मन्त्रीसमेत रहेका युवराज सल्मानसँग सुरक्षा सहयोग र सहकार्यका बारेमा पनि कुरा गरेको जनाइएको छ। 

उनीहरुले क्षेत्रीय तथा अन्तर्राष्ट्रिय चासो र सरोकारका विषयमा छलफल गरेको दुवै देशका अधिकारीहरुले बताएका छन् । त्यसैगरी क्षेत्रीय सुरक्षा तथा स्थायित्वबारे दुवै जनाले विचार आदानप्रदान गरेका थिए। 

इराकी प्रधानमन्त्री काधिमी गत शनिबार साउदी आएको हो। आइतबार नै साउदी अरबको भ्रमण सकेर उनी इरान गएका छन्।