टोखा प्रमुख र उपप्रमुखमा कांग्रेसको अग्रता

काठमाडौं, जेठ ३ : काठमाडौंको टोखा नगरपालिकाको प्रमुखमा नेपाली कांग्रेसकी रजनी थापाले अग्रता लिएकी छन्।

कुल २१ हजार ७२ मत गणना हुँदा कांग्रेसकी थापाले आठ हजार ४३० मत ल्याई अग्रता लिएकी हुन्। उनका प्रतिद्वन्द्वी नेकपा एमालेका उम्मेदवार प्रकाश अधिकारीले आठ हजार २२६ मत प्राप्त गर्नुभएको टोखाका निर्वाचन अधिकृत सविता शर्माले जानकारी दिए। 

यस्तै, उपप्रमुखमा पनि नेपाली कांग्रेसकै उम्मेदवार मुरारी तामाङले अग्रता लिएका छन्। तामाङले ८ हजार ४११ मत प्राप्त गर्दा उनका प्रतिद्वन्द्वी नेकपा एमालेका उम्मेदवार ज्ञानमायाँ डंगाेलले ७ हजार ६६३ मत प्राप्त गरेका छन्।

टोखाको हालसम्म आठवटा वडाको मतगणना सम्पन्न भइसकेको छ। तीमध्ये वडा १ मा नेपाली कांग्रेसका रमेशकुमार लामिछाने, वडा २ मा नेकपा एमालेका धर्मेन्द्र श्रेष्ठ, वडा ३ मा एमालेकै रमेश डङ्गोल, वडा ४ मा एमालेका धर्मेन्द्र श्रेष्ठ र वडा ५ मा एमालेकै मदन गुरुङ अध्यक्षमा विजयी भएका छन्।

यस्तै, वडा ६ मा कांग्रेसका शान्ता खनाल, वडा ७ मा एमालेका नरोत्तम राना र वडा ८ मा एमालेकै रमेश खत्री अध्यक्षमा विजयी भएका छन्। टोखामा अहिले वडा ९, १० र ११ को मतगणना भइरहेको छ। कुल ३४ हजार ६७६ मतदाता रहेको टोखामा २५ हजार ५ सय ६० मत खसेको निर्वाचन अधिकृत शर्माले बताए।