संखुवासभा बस दुर्घटनामा मृत्यु हुनेको संख्या १४ पुग्यो, ५ जनाको जीवित उद्धार

काठमाडौं, फागुन २६ : संखुवासभा बस दुर्घटनामा मृत्यु हुनेको संख्या  १४ पुगेको छ। बिहीबार बिहान संखुवासभाको मादीबाट झापाको दमक जाँदै गरेको  ना ४ ख ७३५ नम्बरको बस मादी नगरपालिका–६ को पुलुड्डस्थित सात घुम्तिमा १४ जनाको मृत्यु भएको हो। 

अहिलेसम्म दुर्घटनामा मृत्यु भएका १४ जनाको शव निकालिएको प्रहरी नायब उपरीक्षक लालध्वज सुवेदीले जानकारी दिए । उनका अनुसार मृतकको पहिचान भने भएको छैन । दुर्घटनामा पाँच जनाको जीवितै उद्धार गरिएको छ । 

स्थानीयका अनुसार बसमा करिब १९ देखि २१ जना यात्रु थिए । बस सडकबाट करिब ३०० मिटर तल खसेको जनाइएको छ । दुर्घटनामा कति जनाको ज्यान गयो भन्ने विवरण सङ्कलन भइरहेको उनले जानकारी दिए । क्षतिको यकिन विवरण आइनसकेको जिल्ला प्रहरी कार्यालयका प्रहरी नायब उपरीक्षक सुवेदीले बताए ।