अमेरिकामा आएकाे आँधी कारण ६ जनाको मृत्यु

वासिङ्टन, फागुन २२ : अमेरिकामा आएकाे आँधी कारण ६ जनाको मृत्यु भएकाे छ। अमेरिकी राज्य आयोवाको म्याडिसन काउन्टीमा शनिबार आएको आँधीका कारण चार वयस्क र दुई बालबालिकाको मृत्यु भएको अधिकारीहरूले बताएका छन्।

एक पत्रकार सम्मेलनमा आँधीले कम्तीमा चार अन्य वयस्कहरू घाइते भएका र  घर र सम्पत्ति दुवैमा व्यापक क्षति पुर्‍याएको काउन्टीको आपतकालीन व्यवस्थापन निर्देशकले बताएका छन्। 

‘केन्द्रीय आयोवाका लागि सबैभन्दा खराब समय समाप्त भएको छ। तूफानहरू पूर्वतिर सर्दैछन्,’ राष्ट्रिय मौसम सेवा डेस मोइन्सले साँझ ७ः३० मा ट्विट गरेर जानकारी दिएको छ।

आइतबारको क्षतिको राम्ररी अनुसन्धान गरिने बताइएको छ। यो आँधी समुदायका लागि धेरै विनाशकारी रहेको र उद्धार प्रयासहरू रातभर जारी रहने सरकारी अधिकारीहरुले जानकारी दिएका छन्। 

आयोवाका गभर्नर किम रेनोल्ड्सले म्याडिसन काउन्टीको लागि प्रकोप घोषणा जारी गर्नु भएको छ। यसले राज्य स्रोतहरूलाई अवस्था सुधार्न सहयोग र प्रयोगको अनुमति दिन्छ।

‘हाम्रो हृदय आज राज्यमा आएको घातक आँधीबाट प्रभावित सबैप्रति भावुक भएको छ,’ रेनोल्ड्सले एक विज्ञप्तिमार्फत भनेका छन्। 

गत डिसेम्बरमा आएको दर्जनौं विनाशकारी आँधीबेहरीले अमेरिकाको पाँचवटा राज्यहरूमा प्रभावित भएको थियो। यस आँधीमा परी केन्टकी, टेनेसी, अर्कान्सास, मिसौरी र इलिनोइसमा  ७७ जनाको मृत्यु भएको थियो।