दुर्घटनामा घाइते भएका वडाध्यक्ष कार्कीको निधन

काठमाडौं, फागुन १४ : मोटरसाइकल दुर्घटनामा घाइते भएका सुर्खेत भेरीगंगा नगरपालिका–१ का वडा अध्यक्ष नवराज कार्कीको उपचारको क्रममा निधन भएको छ । कार्कीको शुक्रबार राति काठमाडौंको न्यूरो अस्पतालमा उपचारका क्रममा निधन भएको प्रहरीले जनाएको छ ।

प्रहरीका अनुसार भेरीगंगा नगरपालिका–१२ छिन्चु बजार नजिक फागुन ८ गते उनी दुर्घटनामा परेका थिए । कार्की सवार मोटरसाइकलाई कर्णाली प्रदेश ०२००१ ख ०५४६ नम्बरको फोर्स गाडीले टक्कर दिएको थियो।

दुर्घटनामा कार्कीको टाउकोमा गम्भीर चोट लागेको थियो । कार्कीलाई ९ गते हेलिकप्टरमार्फत उपचारका लागि काठमाडौं ल्याइएको थियो।

३० वर्षीय कार्की २०७४ को स्थानीय तहको निर्वाचनमा नेकपा माओवादी केन्द्रबाट वडा अध्यक्षमा निर्वाचित भएका थिए।