ओलीले अडान नछाडेपछि प्रधानमन्त्री देउवासँगको छलफल निष्कर्षविहीन

काठमाडौं, फागुन १२ : प्रधानमन्त्री शेरबहादुर देउवा र नेकपा (एमाले) का अध्यक्ष केपी शर्मा ओलीबीचको छलफल बिना निष्कर्ष टुंगिएको छ । 

सरकारका प्रवक्ता ज्ञानेन्द्रबहादुर कार्कीले दिएको जानकारी अनुसार छलफलमा पनि ठोस निष्कर्ष ननिस्किएको हो ।

छलफलमा प्रधानमन्त्री देउवाले सबैको सहयोगमा संसदबाट एमसिसी अनुमोदन गर्नका लागि प्रस्ताव गरेतापनि ओलीले संसद अवरोध गर्नुपर्नाको कारण समाधान नभएसम्म अरु विषयमा सोच्न नसकिने भन्दै अडान दोहोर्‍याएको कार्कीले बताए । 

प्रधानमन्त्रीको सरकारी निवास बालुवाटारमा भएको छलफलमा ओलीसहित एमाले नेताहरू वरिष्ठ उपाध्यक्ष ईश्वर पोखरेल र संसदीय दलका उपनेता सुवास नेम्वाङ सहभागी थिए ।

बैठकमा कांग्रेसका तर्फबाट उपसभापति पूर्णबहादुर खड्का र महामन्त्री गगन थापा सहभागी थिए ।  यद्यपी संसदको गतिरोध अन्त्य गर्न र संसदलाई प्रभावकारी र व्यवस्थित बनाउन वार्ता जारी राखिने भएको छ ।