संसदको कार्यसूचीमा परेन् एमसीसी, सत्तारुढ कांग्रेस भन्छ–थपिन्छ
संसद् सचिवालयले बुधबारका लागि तय गरिएको बैठकका लागि प्रकाशन गरेको सम्भावित कार्यसूचीमा एमसीसी सम्झौता पेसको विषय समावेश नभएसँगै पेस नहुने सम्भावना वढेको हो ।
काठमाडौं, फागुन ४ : प्रतिनिधि सभाको बुधवार (भोलि) बस्ने बैठकमा पनि अमेरिकी सहयोग एमसीसी सम्झौता पेस नहुने भएको छ ।
संसद् सचिवालयले बुधबारका लागि तय गरिएको बैठकका लागि प्रकाशन गरेको सम्भावित कार्यसूचीमा एमसीसी सम्झौता पेसको विषय समावेश नभएसँगै पेस नहुने सम्भावना वढेको हो ।
प्रधानमन्त्री शेरबहादुर देउवाले भोलिको बैठकमा एमसीसी पेस हुने र यो विषयमा आफूले सभामुख अग्नि सापकोटासँग परामर्श गरेको बताए पनि कार्यसूचीमा एमसीसी समावेश गरिएको छैन् ।
भोलिका लागि प्रकाशन भएको कार्यसूचीमा प्रधानमन्त्री शेरबहादुर देउवाले थारु आयोगको प्रतिवेदन पेस गर्ने र तीन जना पूर्व सांसदको निधनमा शोक प्रस्ताव पारित गर्ने उल्लेख गरिएको छ ।
यता, सत्तारुढ प्रमुख दल नेपाली कांग्रेसले भने बैठकको कार्यसूचीमा एमसीसी थपिने दाबी गरेका छन् ।
मंगलबारको केन्द्रीय कार्यसम्पादन समितिको बैठकपछि पत्रकारसँग प्रतिक्रिया दिदैं कांग्रेस प्रवक्ता प्रकाशशरण महतले बुधबारको प्रतिनिधि सभा बैठकको कार्यसूचीमा एमसीसी पनि रहने बताएका हुन् ।
बुधबारको बैठकमा एमसीसी टेबुल गर्ने भनिएका बेला सम्भावित कार्यसूचीमा भने नसमेटिएको हो ।
