तीन सहसचिवको नाम सचिवका लागि सिफारिस

काठमाडौं, माघ २५ : सचिव बढुवा सिफारिस समितिले एक सचिव पदका लागि तीन जना सहसचिवको नाम सिफारिस गरेको छ । 

लोक सेवा आयोगका अध्यक्ष माधव प्रसाद रेग्मीको अध्यक्षतामा मङ्गलवार बसेको बढुवा सिफारिस समितिको बैठकले सहसचिवत्रय मुकुन्द प्रसाद निरौला, विनोद प्रकाश सिंह र गोपीकृष्ण खनालको नाम सिफारिस गरेको हो । 

निरौला गृह मन्त्रालयको शान्ति सुरक्षा तथा समन्वय महाशाखा प्रमुख छन् भने सिंह सञ्चार तथा सूचना प्रविधि मन्त्रालयको प्रवक्ता र खनाल सामान्य प्रशासन मन्त्रालय अन्तर्गतको प्रदेश तथा स्थानीय शासन सहयोग कार्यक्रम (पीएलजीएसपी) को राष्ट्रिय कार्यक्रम निर्देशक हुन् ।